Pajau Media
26th February 2025
Rawt Malan hpung (KIA) ni uphhkang ai shara hkan na mungdan jarit shagyit ni hpaw nga ai raitim Miwa ni kawn gunrai shalai ai lam nnga ai sha n ga ahkun hkangse jaw ra ai majaw jarit mayan gunrai manu matut rawt taw nga ai lam ginra masha ni tsun ai.
Ginra masha ni tsun ai hta Pangwa shagyit hta gunrai shalai na matu KIA hte Miwa Asuya lahkawng maga de shawk shawn laika tang ra ai sha n ga ahkun hkangse jaw ra ai hte gunrai mung aten tup nshang ai majaw gunrai manu rawt nga ai re lam tsun ai re.
“Gunrai raitim, masha raitim lai na nga yang dai ginra na rung de shawk shawn laika tang da ra ai. Dai hkrat yang she dai laika la nna Miwa maga de bai tsun, Miwa ni bai galaw ya ai. Ahkun hkangse jaw ra ai law nna manu rawt ai re,” nga nna Pangwa kaw na shayi sha langai tsun ai re.
Jarit shagyit hkan Miwa maga hku na gunrai shalai na masat da ai sha n ga gunrai nkau mi nshalai shangun ai majaw manu rawt ai re lam tsun ai re. Lai wa sai January shata hkan gaw jak sau ni Miwa maga kawn lagu salai ai majaw manu hpa ai lam mung chye lu ai.
Maga mi hta Mai Ja Yang kaw na shagyit hta mung Miwa maga kawn pat da ai majaw Muse maga kaw na sha gunrai htaw shalai ai majaw manu tsaw ai re lam tsun ai.
“Mai Ja Yang maga mung ya du hkra nhpaw shi ai. Jinghpaw ni maga gaw hpaw da ai rai tim Miwa ni pat da ai. Gunrai ni gaw Muse maga kaw na shang ai. Muse gaw masha ma gunrai ma shang ai majaw rai ni ma dai kaw na sha shawng ai. Dai majaw manu matut tsaw taw ai re,” nga nna Mai Ja Yang ginra masha langai tsun ai.
Ya ten Pangwa ginra hta jak sau gaw CocaCola bu kaba langai hta Miwa Yuan (40), Myen Lap Mun Masum daram jaw ra ai lam, Mai Ja Yang hta gaw 1 Litre hta Miwa Yuan (15), Myen Lap Mun Mi kaw na Mun Mi Chyen ram nga ai lam chye lu ai.
Jinghpaw mung shagyit ni gaw 2024 ning October shata kaw na Pangwa zing majan hta pat da nna, December 13 Ya shani gaw Miwa hte KIO Asuya ni lahkawng maga bawng ban ja hkrup nna bai hpaw ai rai tim, Mai Ja Yang shagyit hta gaw Miwa maga kawn pat da ai majaw Muse kaw na sha gunrai shalai nga ai re.
Shiga - Hpring
Comments