Pajau Media Channel
22nd March, 2024.
Putao Nloi Yang mare makau mayan hta 2023 shaning kaw nna jak kaba ni du shang wa nna ja htu sha ai lam grai dam lada ai hku galaw wa ai re hte ginra masha ni a galaw lu galaw sha shara hkan du hkra htu sha wa ai majaw hkai lu hkai sha shara mat wa ai madang byin nga sai lam ginra masha ni tsun ai.
Ja htu lauban ni gaw lani hte lani du shang nga dingyang re hte ya aten ja ladu lai htu ai majaw mung masha ni galaw lu galaw sha shara lamu ga Eka (2,000) jan daram hten za nga sai lam ginra masha ni tsun ai.
“2023 shaning n nan daw hta ja lau ban ni sa du nna mare de lam galaw ya na, dai na manu lamu ga Eka (30) ja htu ahkang jaw na matu mare salang ni hte myit hkrum da ai re. Hpang daw de gaw ja htu lawk ni grai law wa ai. Tsun da ai hte maren hkrun lam ni hpe mung atsawm galaw ya ai lam n nga ai. Nloi yang mare gaw Putao muklum hte matut mahkai hkawm sa hkrun lam gaw hka lam langai sha nga ai. Dai hpe kawng lam galaw ya na nga tsun da ai raitim ya aten du hkra hkrang shapraw galaw ya ai lam n nga ai” nga nna Nloi Yang mare masha langai tsun ai.
Dai ginra de lani hte lani ja htu lawk ni law wa ai hte mare masha ni a hkau na hkan du hkra htu sha wa ai re majaw ndai lam hpe lit nga ai asuya kawn mung lawan ladan hparan ya na hpe ra sharawng ai nga nna ginra masha langai matut tsun ai.
“Dai ning laman kaw nna mare masha ni a hkau na hkan du hkra htu wa ai majaw galaw sha shara hten za wa ai. Jak kaba ni hte htu sha ai re majaw hka lam ni yawng gashai mat sai. Ya gara hku galaw sha na re n chye mat sai. Lit nga ai asuya kaw nna mung ndai lam hpe lawan pat yang pat kau shangun mayu sai. Asuya gaw ahkun sha hta sha nna mare masha ni a akyu ara hpe kachyi pyi n yu ai nga nna tsun ai”.
Ya aten Putao hte Machyang Baw ginra mali hka mayan nga ai ja maw law malawng jahkring da sai raitim Nloi Yang mare hte Hti Hka lahta daw de ja htu ai lam hpe matut manoi galaw nga ai re. Nloi Yang mare gaw Mali Hka makau kaw nga ai mare langai re hte mung masha htinggaw (120) a lahta nga ai rai nna dai ginra hta shanu nga ai mung masha ni gaw yi sun hkau na galaw sha nna kan bau ai re hpe mung chye lu ai.
Shiga – Mali Hku
Opmerkingen