Pajau Media
6th February, 2025.
Jinghpaw mung, Monyin muklum, Aung Thapyae lawk kata na nta langai mi hta lahkawng lang damya mya hkrum ai rai nna, bat mi laman gumhpraw sen (50) tam jaw ra na lam mung tsun jahkrit da ai hpe chye lu ai.
Mabyin gaw, lai wa sai January shata nhtoi 31 ya shana hkying 7 aten hta masha n-gun (20) daram nga ai wuhpung ni gaw, sinat mung lang rai nna nta langai hta damya mya shang chying lau kau da ai hta gumhpraw hte manu dan ja rai ni mung gashun la mat wa ai re. Bai nna February shata praw 4 ya shana hta mung numdaw lahkawng lang du sa wa nna gumhpraw sen (50) hpe gashun la mat wa ai re.
“Damya ni gaw marai (20) daram re hpe chye lu ai. Nta madu ni hpe gumhpraw sen (500) hpyi ai njaw lu ai majaw U, Wa dut da ai gumhpraw hte manu dan ai ja rai yawng raw la kau ya ai. Damya mya a aten gaw shana hkying 7 kaw na hkying 9 du hkra re majaw, gau ngwi atsawm sha tam gasawk la mat wa ai ga re,” nga nna damya mya hkrum ai nta hte ni nawn ai ginra masha langai tsun dan ai re.
Damya hpung ni gaw nta masha ni hpe lahput hput di, baw gum da shangun nna, gumhpraw sen (500) hpyi ai sha n-ga, njaw yang sat na nga nna jahkrit ai re hte manu dan ja rai hte gumhpraw yawng la kau ya ai rai nna February shata praw 4 ya shana hta mung gumhpraw sen (50) tam jaw ra na lam tsun jahkrit kau da ai re hpe chye lu ai.
Shawng nnan lang damya sa mya ai wuhpung ni gaw sinat mung lang rai mawdaw lahkawng hte du sa wa ai re hte dai wuhpung ni kaw na marai langai gaw Maw Han mare kaw na Balik du langai re lam, nta masha ni hpe tsun kau da ai re hpe mung chye lu ai. Bai nna nta madu wa gaw Balik dap de sa tsun shawk ai lam galaw ai rai tim dai balik dap kaw na du wa gaw “Nanhte nanghpam lu sha dut ai re majaw sa jep ai lam rai na re,” ngu sha tsun ai lam lahta na ginra masha matut tsun dan ai re.
Shiga – Kachin Pyi Tar
Comments