Pajau Media
21.10.2024
Jinghpaw Mung Mohnyin ginra kata NGOs, CSOs ni zuphpawng galaw ai lam, masha hpawng chyawm ai lam ni galaw na rai yang Ausya Uphkang Rung kaw nna ahkang lu yang she galaw lu na lam Asuya Uphkang Rung kawn tsun da ai lam nga ai re hpe chye lu ai.
Ndai lam hte seng nna Asuya Uphkang Rung kawn gaw Zuphpawng gawk shap sha ai Hotel madu ni, Hall madu ni hpe October 4 ya shani shaga la nna tsun wa ai re lam Hotel Magam bungli gindun galaw ai masha langai tsun ai.
“Mohnyin ginra kaw nga ai Hotel madu ni hpe shaga nna zuphpawng galaw ma ai. Hotel hkan masha hpawng chyawm zuphpawng galaw na rai yang Uphkang Rung kaw ahkang hpyi ra ai, shanhte kaw na ahkang lu yang she mai galaw ai, zuphpawng galaw na Uhpung Uhpawng a Mying, shingdu labau, ya aten galaw nga ai bungli masing masa lam ni hpe du hkra shana da ra ai,” nga nna tsun wa ai lam tsun ai re.
Asuya Uphkang Rung kawn Hotel madu, Hall madu ni hpe shaga tsun wa ai hpang kaw nna zuphpawng gawk shap manu ni mung shawoi na hta grau laja wa ai re lam mung Hotel hkan zuphpawng gawk shap nna wunkat ni dingyang galaw nga ai amyu shayi langai mung ya na zawn tsun ai.
“October praw kaw nna zuphpawng gawk shap manu ni mung grai tsaw wa sai, shawng daw de Hall shap manu sen mi jan hte lu ai raitim ya gaw sen masum du mat sai, zuphpawng gawk shap manu ni htam lahkang daram tsaw jat mat ai majaw shawoi na zawn nau masan n sa wa sai, ya na zawn shuk nga ai masa hpe lawan shangut mayu sai,” nga nna tsun ai re.
Ya aten Mohnyin ginra kata masha hpawng chyawm ai lam n galaw na matu tara shang n dau ai lam gaw n nga ai raitim Ramma ni hpawng chyawm ai shara ni hkan Sam Hkyeng P.T.Ts ni hpyen lahkawn ai lam laja lana galaw nga ai re majaw hkawm sa hkawm wa kaw na hkawt grai sadi maja let hkawm sa ra ai lam Kachin Pyi Tar shiga jaw da ai re.
Shiga - Kachin Pyi Tar
Comments