Mohnyin, Nam Mun Ginra Myen Dap Gasat Hkrum Ai Lam Ni Nga Wa Ai Majaw Majan Laja Wa Na Hpe Myit Tsang Nna Mung Masha Ni Hprawng Koi Yen Nga

Pajau Media Channel

26th January, 2024

Mohnyin Nam Mun ginra Myen hpyen dap shagyit dingsa gasat hkrum ai hpang dai ginra hta hkawm sa hkawm wa lam ni grai jep joi wa ai re majaw majan grau laja wa na hpe myit tsang nna girna masha ni gaw ni nawn ai ginra ni hte shanhte shimlum dum ai shara ni hkan hprawng koi yen hkawm nga ra ai lam ginra masha ni tsun ai kaw na chye lu ai.

Nam Mun ginra hta dap jung nga ai Myen hpyen dap ni gaw mung masha ni nga ai makau grup yin de hkrup mara sinat Gap shadam ai majaw hkrit kajawng nna sai rawt ana lu ai salang langai mung asak si sum mat ai re hpe mung chye lu ai. Ya aten Ma hkum kanu ni hte Ma kaji, gumgai dingla ni jam jau nga ma ai sha n-ga hprawng koi yen ai lam sam hkyeng P.T.Ts ni kawn mung pat shingdang ai lam galaw ai re nga nna Mung masha langai ya na zawn tsun ai.

“Mani sha KBC nawku jawng maga sanat shi lang ram gap ai, sai rawt ana lu ai salang langai gaw dai kaw nan grai hkrit kajawng nna asak si sum mat ai, asak kaba sai ni hte ma kaji ni, Ma hkum kanu ni hpe Mohnyin maga de koi yen na matu tsun da ai raitim hprawng yen ai hku arai ni mung lawm rai yang shagyit kaw nna n shalai ai, hkum kaman sha shalai ai re” nga nna Mai Nawng mare kaw na amyu shayi langai tsun dan ai.

Ya aten Nam Mun, Mai Nawng ginra hta Sam Hkyeng P.T.Ts hpung ni hpyen lahkawn ai lam laja lana galaw nga ai re hte lam ntsa pru hkawm ai masha ni hpe sanat gap ai lam ni galaw nga ai majaw kadai mung kadai chye ai hku hprawng yen hkawm nga ra ai masa re lam ginra masha langai tsun ai.

“Dai ginra hta Sam Hkyeng ni hte PDF lapran hpyen masa shaja hkat nga ai masa re, sam hkyeng ni gaw lam ntsa hkan mu mamu masha ni hpe rim lahkawn ai, mani sha pyi marai (20) daram hpe rim majaw woi mat sai, Nam Mun mare kaw gaw masha pyi n nga ai daram re sai ”nga nna Mung masha langai tsun ai.

Nam Mun mare hte dai ginra mayan na mung masha ni gaw ya aten tinang hte ni nawn ai mare kahtawng ni hkan hparawng yen hkawm nga ra ai re, ya aten na hpyen masa maja hkat ra ai masa rai nga ai re hpe mung chye lu ai.

Shiga- Kachin Pyi Tar