Pajau Media
21 February 2025
Mohnyin muklum Aung Thabyae lawk jut shara mi na nam nbyap makau kaw madu nnga yet taw ai masha moi mang langai taw taw ai hpe mu ai lam chye lu ai.
“Tak yu yang si mat ai gaw bat mi ram rai sana re. Grupyin makau kaw na ni gaw yet bat manam na sa yu yang mang rai taw na shana wa ai re. Si ai wa kadai re kun gaw nchye lu ai,” nga nna Metta Laynyein (မေတ္တာလေညှင်း) Karum Kahtau Hpung kaw na marai langai mi tsun ai re.
Masha mang hpe gaw mani February 19 ya shani ka-ang ram kaw ni htap ai grupyin kaw na ni sama lu ai majaw tam yu ai shaloi mu la ai rai nna kadai re hpe gaw matut mahkai nlu shi ai re hpe chye lu ai.
Si mat ai wa gaw karum kahtau hpung ni moi mang hpe shaw la ai shaloi lata kaw tsi samyit htu shakap da ai hte si mat ai re majaw nanghpam jai lang shut ai kawn si mat ai re na re nga nna karum kahtau u-hpung ni kawn sagawn chye lu ai re.
Mohnyin ginra masha ni tsun ai gaw Mohnyin muklum kata Phone line nlu mat ai hpang ya na zawn madu nnga, nchye lu ai moi mang ni grau law wa ai re nga nna tsun ai re.
Shiga – Kachin Pyi Tar
Comments