Pajau Media Channel
12th April, 2024
Mohnyin jau ginwang kaw na Wajau Paul Hkwi Shin Awng hpe April 12 ya (6:40) AM aten daram hta mying n chye lu ai myi man magap da ai la marai lahkawng kawn sanat hte wa gap da nna hkala sawng mat ai lam chye lu ai.
Wajau Paul Hkwi Shane Awng gaw Mohnyin muklum Aung Thapyae (2) lawk kaw na Catholic nawku jawng hta jahpawt Misa Nawku woi nga ai aten myiman magap da ai la lahkawng gaw nawku jawng kata de shang wa nna sanat wa gap kau da ai lam chye lu ai. Wajau gaw kan kaw sanat pala hkra nna hkala sawng ai lam nga ai hte ya aten Mohnyin tsi rung kaba kaw hkyak hkyak tsi tsi hkam la nga ai lam mung chye lu ai.
April 11 ya shana (8:00) PM aten daram hta mung Mohnyin Seing Yadana lawk kaw nna sam hkyeng laili laika hte htunghking hpung ningbaw a nta, lata lang bawm hte wa kapaw hkrum ai lam ginra masha langai tsun ai. “Sam hkyeng laili laika hte htunghking ningbaw U Chit Ngwe a nta gaw anhte n ta hte ni ai, wang kata de nan wa gap ya ai re. Shana aten chyinghka zaw yawng la kau na masha hkra hkala ai lam gaw n nga ai, kadai ni wa gap ai re mung n chye” nga nna tsun dan ai re.
N dai mabyin hpang jahpawt daw hta Mohnyin jau ginwang na Wajau sanat gap hkrum ai manghkang bai byin wa ai masa a ntsa ginra masha ni gaw grai ntsen n hten byin nga ai re. N dai laman Mohyin ginra hta ginra kata nga ai amyu sha ni lapran shada n ju n dawng myi mu hkat wa hkra da sang galaw ai lam ni mung rai na re nga nna ginra masha ni tsun dinglun nga ai re hpe mung chye lu ai.
Shiga - Kachin Pyi Tar
Comments