Pajau Media
30.12.2024
Myityina hte Mohnyin hkawm sa lam lapran Myen hpyen dap hte P.T.Ts pawng hpawm hpung ni a jep joi shagyit grai law wa ai hte shagyit hkan san jep ai lam laja lana galaw nga ai majaw hkawm sa hkawm wa grai dut dang ai lam hkrun lam hkawm masha ni kaw na chye lu ai.
Shagyit shagu ngu na daram hta san jep ai hte grau nna gaw Myitkyina makau Mawhpawng pru wa ai shara kaw nga ai shayit hta mawdaw kaw jawn ai ni yawng hpe shayu nna Mung Chying Masat hpe zing la kau n htawm Mying, Mung Chying Masat Number ni hpe tsun shangun nna n lu tsun ai ni hpe aten na na hkap jahkring da ai re lam hkrun lam hkawm masha langai ya na zawn tsun ai.
“Kaga shagyit hkan gaw mawdaw la ni hpe sha san jep nna mying jahpan madun, jawn lawm ai ni hpe gaw shayu nna shalai ya ai re, raitim Mawhpawng pru wa ai kaw na shagyit kaw gaw Mung Chying Masat shawng yawng zing la kau nna Numbat ni hpe tsun shangun ai, n kau dinggai ni gaw n lu tsun na grai na hkra n hti n htang san jep hkrum ai re, n lu tsun yang aten na na n shalai ai sha tawn da ai re.”
Ya na zawn galaw ai majaw hkawm sa hkawm wa lam hta grai dut dang ai re hte Mung masha ni hpe jam jau jaw ai sha n-ga a sawng asang galaw ai masa re nga nna hkrun lam hkawm Mung masha ni tsun garu nga ma ai re.
Myitkyina-Mohnyin hkawm sa lam ntsa na Deng 21 pawng hpawm shagyit kaba kaw mung KIA-PDF ni a matu arung arai htaw ginlen ai lam galaw ai shiga na ai nga nna laja lana jep joi nga ai re. Myitkyina-Mohnyin hkrun lam lapran hta Myen hpyen dap a pawng hpawm shagyit 20 jan daram nga ai lam hkrun lam hkawm masha ni shana wa ai kawn chye lu ai.
Comments