Pajau Media
11th February,2025
Jinghpaw mung, Mohnyin ginra hta Sam Hkyeng P.T.Ts wuhpung ni kawn muklum kata shamu shamawt ai lam laja lana galaw wa ai sha n-ga, Hpara makau dap jung nna hpyen shamu shamawt ai lam ni mung ding yang galaw nga ai lam ginra masha ni shana wa ai kaw na chye lu ai.
“January shata nhtoi 23 ya shani hkying 2 aten hta sha Kan Thayar makau grup yin dum nta hkan masha jahpan hta ai lam galaw ai. Sam Hkyeng ni, Balik ni, hpyen ma ni hte mare salang ni yawng pawng marai (60) daram re. Hpyen masa Byuha shagreng na matu hkyen lajang taw ai masa rai ma a,” nga nna ginra ramma langai tsun ai.
Dap jahkrat nna shara la na matu Moedar Tsu lawk kata na dum nta ni hkan masha jahpan hta gahkyin nhtawm, Kan Thayar makau dap shara jahkrat nga ai re lam, dai dap shara jahkrat ai hta pawng hpawm hpyen n-gun (60) daram nga ai re hpe mung matut chye lu ai.
Sam Hkyeng P.T.Ts hpyen hpung ni hte Gumshem Myen hpyen dap ni gaw Mohnyin ginra kata lai wa sai January shata kawn hpyen shamu shamawt ai lam laja lana galaw wa ai rai nna, dap jung shara jahkrat nga ai lam, masha jahpan hta gahkyin ai lam, muklum kata shamu shamawt hkawm ai lam hte san jep jahkrit ai lam ni ding yang galaw nga ai re.
Gumshem Myen hpyen dap npu na Sam Hkyeng P.T.Ts hpyen hpung ni gaw shana hkying 7 hpang daw kaw nna, lam maw ntsa sinat hte hkrup mara gap kapaw let marawn matsa ai lam ding yang galaw nga ai majaw Sam Hkyeng hpyen hpung ni ding yang sa du hkring sa ai shara makau hkan na ginra masha ni gaw hkrit tsang ai hte shara htawt koi yen na matu hkyen lajang ai lam ni mung nga ai re hpe ginra masha ni tsun dan ai kawn chye lu ai.
Shiga – kachin Pyi Tar
Comments