Pajau Media
1.14.2025
Mohnyin ginra hta Myen hpyen dap gaw hpyen shamu shamawt ai lam ni grai galaw wa ai hte lak nak kaba hkrup mara gap shadam ai majaw Htantapin mare na Mung masha ni htawt sit ra ai madang byin nga ai lam chye lu ai.
Myen hpyen dap kawn gap dat ai lak nak kaba gaw Mung masha dum nta hkan wa hkrat ai majaw mare salang wa kawn gaw gan htawt sit na matu tsun wa ai hte htawt sit na matu galaw nga ai hta Myen hpyen dap gaw Mung masha n nga ai dum nta ni hkan shang nga na hte wan nat jahten kau na lam tsun ai nga nna Mung masha langai tsun ai re.
“Lak nak kaba hte matut manoi gap nga ai re. Mung masha nga ai dum nta hkan du hkra wa hkrat ai. Masha hkala ai lam nga ai. Mare salang ni gaw htawt sit na matu tsun ai raitim Myen hpyen dap gaw htawt sit yang nta hkan wa shang nga na, wan nat jahten na nga ni tsun ai majaw gara hku di ra na pyi n chye mat sai,” nga nna Mung masha langai tsun ai re.
Myen hpyen dap gaw January (2) ya kaw na Mohnyin ginra kata lak nak kaba gap shadam ai sha n-ga Htantapin mare makau hkan kaduk htu, lam pat nna bawm hkam ai lam ni galaw nga ai lam ginra masha ni matut tsun ai re.
“Myen hpyen dap gaw mare pru shang mai ai shara hkan lam htu nna bawm hkam da ai. Lam ni pat da ai. Ywar Magyi (ရွာ မကြီး) sa lam langai sha hpaw da ya ai. Dakkasu lam hpe mung mawdaw ni nmai hkawm hkra pat da ai re. Pat da ai lam hku hkawm nna bawm kabye kapaw la ai masha nga sai,” nga nna tsun ai re.
Mohnyin ginra hta Myen hpyen dap hte SNA pawng hpawm dap ni mare makau hkan sha shamu shamwat nga ai re majaw Mung masha ni grai myit tsang nga ma ai re. Jinghpaw mung Sagaing jarit mayan de mung Myen hpyen dap pawng hpawm hpung ni hte KIA-PDF pawng hpawm hpung a lapran gasat gala majan laja nga ai re hpe mung chye lu ai.
Shiga - Kachin pyi Tar
Comentários