Pajau Media
13.1.2025
Mohnyin dakkasu jawng wang kaw shara jahkrat nga ai Myen hpyen dap kawn lak nak kaba hkrup mara gap bun ai a majaw Mung masha dum nta kaw wa hkrat kapaw nna asak (13) ning re ai ma langai hkala hkrum ai lam chye lu ai
Mabyin gaw Jinghpaw Mungdaw Masat Nhtoi hpang shani January 11 ya shani hkying 11:00 Am aten daram hta Myen hpyen dap kawn gap dat ai lak nak kaba gaw hpyen yen ai Mung masha ni shanu nga ai dum nta de wa hkrat ai re lam ginra masha langai tsun ai re.
“Ma na kadwi ni gaw Nam Mun kaw nna koi yen wa ai re. Arlawi Kung kaw Nta shap nga ai re, hpyen koi yen wa ai ni sha nga ai re. Kanu kawa ni hte Hopin kaw nna shi kadwi hpang wa chyai ai rai nga, dai shaloi lak nak kaba wa hkrat ai re. Nta gaw lam kaba makau kaw sha re. Nta kaw marai 10 jan daram rawng nga ai re. Ma kasha hkala mat ai re,” nga nna tsun ai re.
Myen hpyen dap kawn gap dat ai lak nak kaba gaw 60 MM ngu maram lu ai lak nak kaba rai nna Myen hpyen dap kawn bai wa zing la mat sai re hpe mung chye lu ai. Mohnyin ginra hta lai wa sai January 2 ya daram kaw nna Myen hpyen dap kawn lak nak kaba hkrup mara gap bun nga ai re lam ginra masha ni tsun ai kaw na chye lu ai.
Lak nak kaba wa hkrat kapaw ai dum nta masha ni gaw ya aten gan htawt sit nga ai lam chye lu ai. Lai wa sai bat laman hta mung Htan Tapin mare mayan kaw Myen hpyen dap kawn hkam tawn da ai hkam bawm kabye kapaw la nna Mung masha marai 4 hkala hkrum ai lam nga lai wa sai re.
Shiga – Kachin Pyi Tar
Kommentare