Pajau Media Channel
June 17, 2024
Miwa mung jarik Kanpaiti muklum hta gunrai htaw maw daw hte jak sau htaw maw daw tsa lam chyat mat ai majaw ndai laman Myitkyina hte Waingmaw muklum ni hta jak sau taw mat nna, manu rawt tsaw lung wa ai lam, ginra masha ni tsun dan ai kawn chye lu ai.
Ya na zawn jak sau manu ni rawt tsaw wa ai gaw Miwa mung jarik rai nga ai gunrai madung hting let ai myo mare kaba Kanpaiti muklum hta jak sau htaw maw daw hte gun rai htaw maw daw ni chyat rawng nga nna pru shang ai lam nnga ai majaw re lam ginra masha ni tsun ai re.
Ya aten Myitkyina ginra hta gun rai manu rawt tsaw nga ai sha n-ga, mani kaw nna jak sau seng pump nkau ni pat mat ai re hte jak sau taw wa ai re hpe chye lu ai.
Maw daw langai mi hta gumhpraw lap mun masum a matu sha dut ya ai rai nna, cycle langai a matu gaw gumhpraw lap hkying manga a matu sha dut ya taw ai re.
Lai wa sai June shata 11 ya shani hta Wunpawng Mungdan Shanglawt Hpyen Dap (KIA)gaw Sadung-Kanpaiti sa lam ntsa na myen hpyen gumshem Pyitutsit hpyen dap ni hpe htu shadut majan dang ngut ai hpang, dai ni du hkra Waingmaw-Kanpaiti sa lam hpe aten n masat ai sha pat jahkring da ai re.
Dai aten kaw nna gun rai shalai ai lam hkring mat ai rai nna Kanpaiti muklum hta gun rai htaw maw daw tsa lam chyat rawng mat ai sha n-ga, Myitkyina hte Waingmaw ginra ni hta mung gun rai manu, jak sau manu ni rawt tsaw mat wa ai re lam, ginra masha ni tsun dan ai kawn chye lu ai.
Comments