Pajau Media
24.10.2024
Miwa mung jarit mayan shanu nga ai Mung masha ni gaw Miwa de na shang gunrai ni hpe madung tawn nna dut lu dut sha nga ai hta ya aten Miwa jarit chyinghka yawng pat kau ai hpang kawn Laiza muklum hte jarit mayan hta Shan, Nga hte malu masha gunrai ni taw ai mayak hkrum sha nga ai lam Laiza ginra masha ni tsun ai.
Laiza de shang ai gunrai ni gaw Miwa maga de na sha law malawng re hte nam law nam lap kaw na hkawt Shan, Nga ni mung Miwa de na hkrai htaw dut ai re raitim kajawng kaja Miwa jarit pat mat ai majaw Nga dut sha ai bungli hkring da ai bat mi rai wa sai nga nna Laiza kaw Nga dut nga ai amyu shayi langai tsun ai.
“Myen mung de na Mung n shang mat ai re majaw Miwa kaw na sha madung htaw shalai dut sha ai re wa jarit chyinghka ni mung pat mat ai majaw Nga n dut byin ai pyi bat mi rai wa sai. Miwa hkran chyinghka hpaw na hpe sha la taw ra sai. Myen mung de na shang ai gunrai ni gaw hpa mung manu grai hpu ai. Hpa mi nga nga Miwa de na shang ai gaw manu loi hkyem sa ai,” nga nna tsun ai.
Gat hkan Shan ni n dut mat ai madang re hte Wa shan ni sat dut ai ni nga tim Joi mi hta lap 40,000 dut sha ai hte Udi ni mung n nga ai daram rai wa nna Miwa hkran gate hpaw yang she shan lu sha na masa byin nga ai lam ginra masha langai mung matut tsun ai re.
“N dai bat kaw na rai sai. Pangwa zing ai hpang shana hkying 12:00 daram kaw na Miwa gate pat kau sai nga na ai hte kalang hta gashun gashe arai ni mari la ma, ngam ai sha gaw manu bai hpu rai na grai yak sai, shan hte seng ai hpa nlu sai. Bahkri si du hkra pyi tam yak mat sai. Miwa hkran hku na sha shalai sha ai re nga yang gaw yak sai ga re.”
KIA pawng hpawm hpyen hpung ni gaw Pangwa ginra nga ai jarit sin hpyen hpung ni a dap shara ni hpe htu shadut htim gasat zing madu ai hpang KIA uphkang ginra kata nga ai Laiza, Mai Ja Yang, Loije hte Kanpaiti jarit chyinghka yawng hpe Miwa maga kawn pat kau ai re hpe mung chye lu ai.
Ya aten Jinghpaw mung kata madung jai lang nga ai Jak Sau hte malu masha gunrai ni gaw Miwa de na shang ai re hte Miwa jarit pat mat ai majaw Jak Sau, gunrai manu ni lani hte lani tsaw lung nga ai majaw jarit mayan shanu nga ai Mung masha ni grai nga yak nga ai masa byin nga sai lam chye lu ai.
Comments