Miwa Jarit Chyinghka Ni Bai Hpaw Sai Lam

Pajau Media

2. April .2025

Jinghpaw hte Miwa jarit ginra ni rai nga ai Mai Ja Yang, Loi Je hte Laiza shagyit ni hpe Miwa maga kawn bai hpaw ya sai re lam jarit mayan ginra masha ni kaw na chye lu ai.

Miwa asuya kawn shata 4 daram na hkra pat da ai Miwa jarit ni hpe March 28 ya kaw nna bai hpaw ya sai rai nna malu masha hte jai lang mai ai gunrai ni hpe gaw wang lu wang lang shalai ya nga sai re lam Mai Ja Yang ginra masha langai tsun ai re.

“Ya gaw gunrai ni hpe moi na zawn masat ai lam n nga sai, wang lu wang lang mai shalai sai. Mawdaw ni shani shagu pru shang nga ai,” nga nna ginra masha tsun ai.

Laiza jarit chinghka hta gaw nam law nam lap, nam si nam saw ni hpe sha madung shalai nga ai hte kaga bu hpun palawng zawn re ai gunrai hpan ni hpe gaw shalai ahkang n jaw shi ai lam Laiza Miwa jarit makau kaw shanu nga ai Mung masha langai tsun ai kaw na chye lu ai.

Jinghpaw mung de gunrai htaw shalai ai lam hpe naw pat da ai aten Jinghpaw mung kaw nna Miwa de Langu mawdaw, Kumshu hte Ginshau Si ni hpe matut manoi htaw shalai ai lam hpe gaw ahkang jaw hkap la lai wa ai re hpe mung chye lu ai.

“Shanhte Miwa maga kaw na shagyit ni hpe pat ai raitim Miwa de shang ai gunrai ni hpe gaw hkap la ai. Langu mawdaw, Kumshu mawdaw, Ginshau si htaw ai mawdaw ni gaw matut manoi shang nga ai, raitim Myen mungdan de gaw gunrai shalai ahkang pat da ai,” nga nna mung matut tsun ai.

Miwa jarit chyinghka ni bai hpaw ya na matu Miwa jarit mayan shanu nga ai Mung masha ni kawn Beijing Miwa Asuya Rung de laika lang hte lang bang ai majaw Miwa jarit chyinghka hpe bai hpaw ya ai re lam chye lu ai.

Shiga -Hpring