Pajau Media
16.1.2025
Miwa jarit rai nga ai Hpimaw ginra hta Miwa jarit chyinghka hpaw nga ai raitim gunrai htaw shalai ai lam n nga ai re majaw ya aten Hpimaw ginra kata gunrai taw nna jak sau ni manu grai rawt nga ai re lam ginra masha ni tsun ai re.
Miwa jarit hku gunrai n shalai ai majaw gunrai ni hpe Myitkyina maga kaw nna htaw shalai la ra ai hte gunrai manu grai rawt nga nna mari sha na matu n loi ai masa re lam Hpimaw ginra masa hpe mung masha langai tsun ai.
“Miwa shagyit ni gaw hpaw sai, gunrai gaw n shang ai. Gunrai ni hpe Myitkyina kaw na sha htaw shalai la ra ai. Ga sau bungli dabang ni pat da ai re majaw bungli taw ai, shang gumhpraw n nga ai. Dingyang na mari lu mari sha na mung n loi ai,” nga nna tsun ai re.
KIA pawng hpawm hpung ni kawn Hpimaw ginra hpe lai wa sai 2024 November praw laman zing madu da lu sai hpang Hpimaw ginra sha n-ga Pangwa ginra kata na Ga Sau bungli ni pat mat ai re. Ya aten Pangwa ginra na Ga Sau bungli dabang ni bai hpaw sai raitim Hpimaw ginra kata gaw naw pat da ai re lam chye lu ai.
Dai ginra masha ni gaw Ga Sau bungli dabang hkan bungli galaw nna shang gumhpraw tam nga ai re hte bungli dabang ni pat mat ai hpang shang gumhpraw n nga ai hta gunrai manu ni rawt re ai majaw grau yak hkak nga ai re hpe mung chye lu ai.
Ya aten Hpimaw ginra hta gunrai sha n-ga jak sau manu ni mung rawt nga ai re. Jak Sau 1 liter kaw Miwa Yun 50, Myen gumhpraw hku rai yang lap 31,250 MMK hkrat ai lam chye lu ai. Miwa jarit hku gunrai n shalai ai majaw Myitkyina maga kaw nna gunrai htaw la ra ai hta hkrun lam yak hkak ai majaw gunrai manu ni rawt ai masa re hpe mung chye lu ai.
Shiga – Hpring
Comentários