Miwa company ni kaw na kumshu manu hpe shatsaw na nmari mat ai majaw kumshu hkai ai masha ni mayak hkrum taw nga ai lam

Pajau Media

3 Jan 2025

KIO Up hkang da ai Mai Ja Yang ginra hte Loi Je ginra hta kumshu hkai bungli hpe madung tawn nna galaw sha taw ai hpe Miwa mungdan kaw na kumshu mari ai company kaw na manu tsaw nmari ai majaw kumshu daw dut ten du ai rai tim ginra masha ni kaw na kumshu daw dut ai masha nnga ai hpe chye lu ai.

Lai wa sai ten hta kumshu Tan mi hta miwa gunhpraw yun(450)du hkra manu lu ai raitim Covid shata hta gaw kumshu Tan mi hta yun(350) sha manu lu ai hte ya ten hta mi na manu hta na grau tsaw nna mari ai lam ni nnga ai hta na htaw sa htaw wa na matu pa mayak law law nga ai hpe chye lu ai.

Kumshu hkai ai ni tsun yang gaw kumshu hkai sun kata bang ai nam hpun hte laga ra ai arai ni gaw laning hte laning maru grau rawt wa ai rai tim kumshu manu gaw rawt tsaw wa ai lam nnga ai hpe chye lu ai.

Kumshu hkai ai masha ni kaw na mari ai miwa company ni hpe kumshu manu shatsaw jaw na matu laika ka mara na bawng ban tsun jahta ai lam galaw timung ya ten du hkra bai tsun wa ai lam nnga ai majaw kumshu hkai ai masha ni gaw mi na manu hte kumshu daw dut taw ai lam nga timung sum na lam nga chye ngu na tsun taw nga re.

Lai wa sai shaning hta ra ai arung arai hte jai lang ai namhpun plastic hta na hkawt kumshu mari ai company kaw na tup hkrat garum nga wa ai rai tim Covid shata 2020 ning hpang ladaw de jai lang ra ai arung arai ni hpe miwa ni njaw lang mat sai lam hpe ginra masha langai mi tsun ai kaw na chye lu ai re.

Kumshu hkai sun ni hpe December shata kaw na March shata du hkra daw ra ai hte Jinghpaw mung kata majan a majaw bungli galaw ai masha yawm wa ai mang hkang hkrum taw nga ai hte kumshu daw dut tim sum ai lam ni nga ai majaw dai ginra na masha ni kaw na kan bau bungli na matu myit tsang taw nga ai hpe chye lu ai.