Pajau media
4th March, 2025
Jinghpawg mung Danai Lido lam maw ntsa na Shadu Zup mare hta shara la dap jahkrat nga ai Min Zin Thant Pyi Tu Tsit hpung ni kawn ndai laman hpyen shamu shamawt ai lam laja lana galaw wa ai lam ginra masha ni tsun dan ai kawn chye lu ai.
Pyi Tu Tsit hpung ni gaw mare kata hpyen shamu Shamawt ai lam galaw nga ai sha n-ga, lak nak kaba hte ding yang gap gasat nga ai rai nna ginra masha ni manu shadan tawn da ai akyu hpyi bum ntsa hkan dap shara la jahkrat nga ai re hpe chye lu ai.
Ndai zawn ginra masha ni manu shadan tawn da ai shara ni hta hpyen masa hte seng nna dap shara jahkrat da ai hpe ginra masha ni nra sharawng ninghkap nga ai rai nna, mare kata lak nak hkrup mara gap jahkrat ai lam grau laja lana galaw wa ai majaw mung, grai myit tsang nga ma ai re.
Min Zin Thant woi awn ai hpyen hpung ni gaw Danai-Lido lam ntsa na Wara Zup, Shadu Zup, Awng Ra ndai mare ginra ni hta hpyen n gun jat shamu shamawt lam galaw nga ai hte KIA hpung ni hte mung hpyen masa shaja hkat nga ai re.
Gumshem Myen hpyen dap hte pawng hpawm hpyen dap ni gaw Mohnyin ginra, Danai-Lido lam mayan, Myitkyina ginra lahta mayan hta dai ning shaning ningnan aten kaw nna, hpyen shamu shamawt ai lam ading ayang galaw nga ai sha n-ga, hpyen lahkawn ai lam mung jahkring hkring galaw nga ai re hpe ginra masha ni tsun dan ai kawn chye lu ai.
Shiga – Htu Seng
Comentarios