Pajau Media Channel
11.6.2024
Jinghpaw mung kata wunpawng mungdan shang lawt asuya KIA pawng hpawm hpyen hpung ni hte myen hpyen dap lapran May shata laman gasat gala majan (94) lang byin ai lam Pajau Media kawn sawk sagawn gahkyin da ai kaw na chye lu ai.
May shata laman Jinghpaw mung ginra kata gasat gala majan byin ai shara ni gaw Waingmaw, Hpakant, Man Je, Nmawk, Danai, Shwe gu, Sumpra bum ginra ni re hte majan laja dik ginra gaw Waingmaw ginra re hte ya aten du hkra hpyen masa gaw shaja hkawt nga dingyang re. May shata laman myen hpyen dap gap dat ai n bungli bawm, lak nak kaba a majaw mung masha marai (156) hkala hkrum ai lam nga ai hte mung masha marai 29 asak si sum mat ai lam nga ai re hpe mung chye lu ai.
Myen hpyen dap gaw gasat gala majan laman hpyen n bungli ni, lak nak kaba ni hkrup mara gap shadam ai majaw May shata laman mung masha dum nta (1,296) daram hten za mat ai re hte May shata lama mare kata kaw gasat gala byin nna hprawng koi yen ai ni nga ai zawn, lak nak kaba tsang ra ai majaw hprawng yen ai ni yawng rai yang marai 21,300 ram re lam sagawn chye lu ai.
Gasat gala majan hta myen hpyen dap maga na marai (180) asak si sum ai lam sagawn chye lu. Jinghpaw mung kata march (7) ya kaw nna byin wa ai gasat gala majan hpang myen hpyen dap shara law law hpe zing madu la lu ai hte Sumpra Bum ginra, N Jang Yang ginra, Sinbu hte Loi Je ginra ni hpe tsep kawp zing la lu sai re hpe mung chye lu ai.
Jinghpaw mung kata gasat gala majan gaw laja nga dingyang re hte myen hpyen dap gaw mung masha ni yen kau da ai mare kahtawng ni hkan n bungli bawm, Drone bawm, lak nak kaba ni gap jahkrat bun ai lam ni dingyang galaw nga ai re majaw hpyen koi yen mung masha mung lani hte lani law jat nga ai re hte ya aten Jinghpaw mung kata hpyen yen masha mun kru hkawt nga sai re hpe mung chye lu ai.
Comments