Pajau Media Channel
June 25, 2024
Myitkyina-Puato mawdaw lam kaba hpe mani June shata 24 ya shani kaw nna shawoi na hte maren bai hpaw ya sai lam chye lu ai.
Marang htu sawng ai hte Putao muklum ndu shi yang Tang Ja mare makau hta ga gyi ru nna hkrun lam yak mat ai majaw June shata 21 ya shani kawn gan jahkring da ai hpang, mani June shata 24 ya shani hta Myitkyina- Putao lam hpe bai hpaw ya ai re.
Putao ginra masha ni tsun ai hta shata masum daram pat jahkring da ai mawdaw lam hpe bai hpaw ya sai raitim gun rai manu gaw shawoi na manu du hkra yawm hkrat ai lam n-nga ai re hte, mung shawa ni hkrun lam hkawm ahkang mung nlu shi nna gun rai htaw shalai ai hta mung seng ang ai shagyit kaw na ahkang lu yang sha pang hte pang htaw shalai lu ai lam tsun ai re.
“Mawdaw gaw langai hpang langai pang hte pang lung ra ai. Law htum gaw lani mi hta mawdaw manga kaw na kru daram sha lung na ahkang lu ai. Gun rai mying ni yawng hpe tup hkrak laika ka mara ra ai. Jak sau gaw nhtaw shangun ai. Gun rai mying ni hpe Putao shagyit hpang jahtum kaw du yang mung kalang bai jep ra ai. Dai jep ngut ai hpang she gun rai htaw jahkrat na mai ai,” nga nna gun rai htaw masha langai tsun dan ai re.
Ya aten gun rai htaw masha ni gaw lahkawng maga na lak nak lang hpung ni hpang de gun rai mying jahpan hpe tau hkrau shagun jaw ra ai rai nna seng ang ai wuhpung ni kawn tara shang masat shagrin ya ai hpang she mawdaw 7 daram hta kalang pang hte pang Putao muklum de htaw lung mai ai re hpe chye lu ai.
Lai wa sai ten lani mi sha sa ra ai Myitkyina-Putao lam hpe ya aten lahkawng maga na lak nak hpung ni a san jep ai shagyit grai law ai majaw yawm htum lahkawng ya du hkra sa ra ai sha n-ga mawdaw lam hpe bai hpaw ya sai raitim gun rai ni hpe pang hte pang masat htaw lung ra ai re majaw gun rai manu gaw rawt tsaw nga ding yang naw re lam ginra masha ni tsun ai re.
Wunpawng mungdan shanglawt hpyen dap (KIA) hte Myen hpyen dap lapran gasat gala majan a majaw March shata praw kawn shata masum daram du hkra pat jahkring da ai Myitkyina-Putao lam kaba hpe lai wa sai June shata praw 8 ya shani kawn lahkawng maga na lak nak lang hpung ni a ahkang hte bai hpaw ya ai re hpe ginra masha ni tsun dan ai kawn chye lu ai re.
Shiga- Malihku
Comments