Matut Mahkai Yak Ai Majaw Putao Ginra Na Tsang 12 Bai Htai Na Lam Hte Seng Nna Yak Hkak Nga Ma Ai Lam

Pajau Media

8.April.2025

Putao ginra kata 2024-2025 hpaji ladaw tsang 12 san poi hpe lai wa sai March 17 kaw nna 22 ya laman hta htai da ngut sai raitim Myen mungdan lahta daw san poi san jep rung wan hkru mat ai majaw tsang 12 hpe bai htai ra ai lam asuya hpaji rung kawn matsun wa ai re hpe chye lu ai.

Putao ginra na jawng ma ni gaw laning mi san poi aten ngut ai hpang kadai mung kadai na ginra de n htang wa ai mat ai jawng ma ni law ai re majaw Ya aten shanhte hpe matut mahkai nna San poi bai htai na lam hte seng nna yak hkak ai lam nga ai hpe jawng sara langai tsun ai re.

“Tsang 12 kalang bai htai na ni gaw May shata htum maga kaw bai htai ra ai re, n kau gaw laika ni bai galaw nga sai, yak ai gaw Putao ginwang kata tsang 12 jawng ma law dik gaw Putao Lahta Tsang Jawng, Duk Dang lahta tsang jawng kaw law dik re, jawng ma ni gaw san poi ngut ai hte tsan ai shara shagu de wa mat sai, matut mahkai na mung grai yak mat sai, Jawng ma law malawng gaw n dai masa hpe n chye ai jawng ma ni law law naw re majaw Shanhte a matu grai tsang ai” nga nna tsun ai re.

Putao ginra kata muklum hte ni gahtep ai hkan na Jawngma ni gaw laika ni hpe bai galaw nga sai re, raitim matut mahkai yak ai ginra hkan nga ai jawng ma ni law law re hte law malang gaw n lu lawm shi ai lam mung chye lu ai.

 Lai wa sai March 28 shani Mandalay ginra hta byin ai N nang nawn byin ai hpang san poi mahtai pa jep joi ai rung wan hkru mat ai hta Jinghpaw Mung na tsang 12 jawng ma 8,699 a Mahtai Pa hte rau sen masum jan wan hkru lawm mat ai majaw Myen mungdan kata na tsang 12 hpe bai htai ra wa ai re lam chye lu ai.

Shiga- Mali Hku