Pajau Media
14 February 2025
Manmaw gingwang Manje muklum Manwin Gyi ginra hta mung shawa pat jasan hpung hte Ulampa ginwang KIO pat jasan ni pawng nna pat jasan bungli galaw wa ai majaw ginra kata kani nanghpam dut mari lusha ai ni yawm wa ai lam hpe mung masha ni tsun ai kawn chye lu ai.
“Ya na zawn dai pat jasan bungli galaw hpang wa ai hpang ginra kata nanghpam lu sha ai ni nga hkawm taw ai hpe n mu lu sai. Mi shawmg de gaw lam hkan hkrai majoi nga hkawm taw ma ai. Ya gaw tsawmra yawm wa ai hpe mu ai,” nga nna Manwin Gyi ginra nga slg langai tsun ai kawn chye lu ai.
Manwin Gyi ginra hta lai wa sai February praw 10 ya hte 12 ya du hkra nanghpam lu sha hkoi tsai mat hkra uhpung lahkawng hte 3 ya tup pat jasan bungli galaw wa ai kaw nanghpam lu sha ai ni marai 25 hpe Manwin Gyi ginra kani dawn dabang kaw rim woi da nna dai lu rim da ai masha ni kaw na kani hpraw hte yama tsi hkyep kachyi mi lu rim zing la ai hpe chye lu ai.
“Mi shawng de Manwin ginra hta nanghpam lu sha ai ni hte dut mari ai ni grai law ai. Ngut na lagut damya ni ma grai law ai. Rai tim ya gaw pat jasan bungli shang wa ai shata lahkawng masum ram rai wa sai majaw dut ai ni ma yawm wa sai, nanghpam lusha ai ni ma yawm wa sai. Mare kaw kani ya ni nga hkawng taw ai ma n nga ai daram rai sai,” nga nna lahta na slg wa matut tsun ai re.
Kani nanghpam lusha ai ni hpe pat jasan ni kaw na shata 6 dawn dabang kaw kani dawn mat ya na hte ya na zawm mare hta pat jasan bungli galaw taw ai mung shata masum ram rai wa sai hpe pat jasan hpung kaw na masha langai tsun ai kawn chye lu ai.
Pat jasan bungli galaw wa ai shata masum ram hta mare ginra kata lagut damya yawm wa ai hte nanghpam dut lu dut sha ai ni mung yawm wa ai hpe matut chye lu ai.
Pat jasan hpung ni kawn mung Mung masha ni hte ramma ni nanghpam lu sha jai lang ai kaw na lawt lu hkra matsing hte galaw nga ai rai nna mare ginra hta lagut damya grai law wa ai majaw mare masha ni hpyi shawm wa ai the maren pat jasan bungle galaw shang wa ai hpe chye lu ai.
Shiga – Zau Mai
Comments