Pajau Media
18th February, 2025
Jinghpaw mung, Manmaw-Nmawk-Manje ginra na hpyen yen masha ni shawoi na hta grau yakhkak nga ai lam hpyen yen mung masha ni tsun ai.
Manmaw majan naw matut laja nga nna hpyen yen masha ni mung hpyen yen ten shata lahkawng jan wa sai re hte nga shara, malu masha, nta arung arai hte tsi mawan ni mung grau yakhkak nga nna, tam lu tam sha na mung lam shagu hta yak nga ai lam hpyen yen Masha ni tsun ai.
Manje muklum, Manwin Gyi ginra hkan na hpyen yen htinggaw (800) jan na matu nga shara, malu masha hte tsi mawan ni yak nga ai sha nga, lang na hka nlaw ai lam, hka taw ai lam ni mung hkrum sha nga ai lam tsun ai.
Hpyen yen ni gaw karum ningtum ni nlu ai sha n ga bungli galaw na mayak, shara shagu majan byịn ai lam ni, nbungli bawm hte hpyen lahkawn ai lam ni a majaw gumhpraw tam na mayak ni hkrum sha nga ai lam tsun ai re.
Hpyen yen ni gaw KIO ni jum da ai majan nbyin ai shara Mai Ja Yang, Laiza, Nba Pa, Nmawk, Manje ginra hkan hprawng yen nga ma ai rai nna, nkau mi gaw nam de hprawng ai ni mung nga ai lam tsun ai.
Manmaw ginra hta lai wa sai December shata 4 ya shani kawn KIA pawng hpawng dap hte myen hpyen ni a lapran gasat gala byin nga ai shata lahkawng jan wa sai raitim, dai ni February 18 ya du hkra lahkawng maga majan laja lana naw byin nga ai re.
Dai majan hta Myen yen dap gaw nbungli kawn lusha hte hpyen arung arai ni jahkrat ya ai lam shani shagu galaw nga ai hpe ginra masha ni tsun ai kawn chye lu ai.
Comments