Pajau Media
7.11.2024
KIA Masat (3) Dap Ba ginra Manmaw-Nmawk lapran hta KIA pawng hpawm hpyen hpung ni hte Myen hpyen dap lapran gasat gala bai laja wa ai lam chye lu ai.
Myen hpyen dap gaw November praw 4 ya shana 7:00 pm aten KIA pawng hpawm hpung ni shara la nga ai Awng Mye mare maga de lagaw lam hpyen n-gun htu shadut shamu shamawt wa ai majaw gasat gala majan laja wa ai re lam shawng lam shiga kaw na chye lu ai.
Dai sha n-ga November (5) ya jahpawt 4:30 am aten daram kaw nna mung KIA pawng hpawm hpung ni nga ai maga de lak nak kaba hpan hkum gap bun ai hte Tank Mawdaw ni hte bai htu shadut laja lana htim gasat nga ai majaw majan laja nga ai re.
Myen hpyen dap gaw Drone bawm ni, Jet fighter ni hte matut manoi gap bun ai sha n-ga Manmaw kaw daju ai Ts.K.Hk 21 kaw na mung hpyen n-gun jat htim gasat ai majaw gasat gala majan gaw matut manoi laja wa mai ai lam hpyen masa maram masam nga ai ni tsun da ai re.
KIA gaw Gumshem Uphkang masa hkoi tsai mat hkra htim gasat na ngu ai masing kata Manmaw Nmawk ginra sha n-ga Miwa Mung jarit mayan hta mung matut manoi htim gasat nga ai hta ginra sin hpyen dap shara law malawng hpe Padang dip zing madu la lu sai lam mung chye lu ai.
Comments