Pajau Media
22.10.2024
Jinghpaw Mung Manmaw Nmawk ginra de October praw laman hta majan loi zim taw ai masa raitim October 20 ya kaw nna Nmawk deng 7 maga de Tank Mawdaw 5 daram lawm rai nna hpyen n-gun jat laja lana htu shadut htim gasat wa ai hpe KIA pawng hpawm hpyen hpung ni kawn hkap shingla gasat dingyang re lam chye lu ai.
October 20, 21 laman Nmawk Deng (7) maga de laknak kaba ni hte sha n-ga nbungli bawm, drone ni hte bawm wa jahkrat garum nna lagaw lam hku Tank Mawdaw 5 mung lawm rai nna laja lana htu shadut htim gasat nga ai hpe hkap shingla gasat ai majaw Myen hpyen dap maga na bai htingnut mat ai lam nga ai re hpe mung chye lu ai.
Nmawk ginra kata na Myen hpyen dap HK.M.Y 437 Dap hte Kawng Ja Yang Myen hpyen dap hpe lai wa sai August 19 ya shani zing madu la ai hpang Manmaw Nmawk ginra kata de Myen hpyen dap gaw ga lam, nbungli hku nna laja lana bai htim gasat wa ai re. Gasat gala majan zim ai aten raitim nbungli bawm hkrup mara gap sharu bun ai majaw dai ginra mayan na Mung masha ni Mun lam hpyen koi yen ra mat ai re.
Myen hpyen dap gaw gasat gala majan n byin ai aten raitim nbungli hte shani shagu sa gap ai majaw koi yen da ai dum nta ni hpe jahkring jahkra wa yu na matu mung nbungli bawm hkrit nna nlu wa yu ai lam hpyen yen Mung masha ni tsun nga ma ai re.
Ya aten Jinghpaw mung sha n-ga Myen mungdan shara shagu hta Myen hpyen dap kawn nbungli jai lang nna laja laan htim gasat nga ai re hte October shata laman KIA/PDF pawng hpawm hpung ni kawn BGF Laksan Uphkang ginra ni rai nga ai Pangwa Muklum, Chihpwi, Saw law Muklum, Jarit Sin hpyen dap Masat 1002,1003 ni hpe mung zing madu da lu sai hte ginra jasan ai lam hte KIO uphkang masa kri lu na matu matut manoi galaw nga ai lam chye lu ai.
Comments