Pajau Media
13.1.2025
Jinghpaw mung Manmaw muklum maga de ya aten gasat gala majan gaw zim taw ai masa rai nna January (9) ya shani Manmaw nbungli pa hte Hk.L.Y (47) dap hpe KIA pawng hpawm hpung ni zing madu la sai nga shiga hpe n lu shagrin shi ai lam Manmaw Scout Team kawn n dau da ai re .
Dai shiga hte seng nna Manmaw ginra na myitsu salang kawn mung n lu shagrin shi ai lam ya na zawn tsun ai re. “Dai shiga hte seng nna n lu shagrin shi ai. Hpa mung n na lu shi ai. Shawng de Hk.L.Y 47 hpe n nan gap ai shaloi mung zing sai nga nna tsun ai, kaja zing sai shadu ai. Ya ma dai hku shadu ma ai. Nbungli pa hpe shawng daw hta mung drone hte wa gap bun ai lam ni nga sai.”
Ya aten Hk.L.Y 47 mayan de na hprawng lawt nga ai Myen hpyen dap masha ni hpe KIA kawn hkan shachyut htim gasat nga ai rai nna Manmaw dakkasu jawng mayan de mung gasat gala majan byin ai lam nga ai raitim Manmaw muklum kata hpyen masa zim taw nga ai re hpe mung chye lu ai.
Manmaw ginra hpe December 4 ya kaw nna htim gasat ai hta January 8 ya shani hta gaw Manje ginra hpe zing madu la lu sai re. January 9 ya shani hta mawng pru nga ai Manmaw nbungli pa zing ai lam hte seng nna KIA shiga magam dap lithkam kawn mung n lu shagrin shi ai lam VOA shiga hta tang madun da ai re.
Jinghpaw shiga ni hta tang madun da ai gaw hprawng lawt nga ai Myen hpyen la Marai (300) hkawt nga ai rai nna marai 100 jan gaw asak si sum ai hte lak nak jahkrat shang wa ai ni lawm ai lam tsun da ai re.
Maga mi de Myen hpyen dap ningbaw Min Awng Hlaing gaw mung masa hpe bawngban ai ladat hte hparan sa wa na lam Jinghpaw mungdaw n htoi hta tsun ai lam nga ai raitim Jinghpaw mung Danai ginra, Hpakant hte Mohnyin ginra ni de nbungli bawm hte laknak kaba ni gap bun nna Mung masha law law si shkala hkrum nga ai re lam chye lu ai.
Shiga -Htu Seng
コメント