Pajau Media
21.8.2024
Jinghpaw mung Nmawk kaw daju nga ai Myen hpyen dap kawn Manmaw ginra nga masha marai (21) hpe rim woi mat ai bat mi na wa sai raitim bai dat ya ai lam n nga shi ai re hpe chye lu ai.
Myen hpyen dap kawn rim woi hkrum ai mung masha ni gaw Manmaw Deng (3) lawk kaw shanu nga ai mung masha ni rai nna lai wa sai August 12 ya shani Deng 6 kaw nga nga ai aten rim hkrum ai rai nna bat mi na wa sai hte bai dat ya ai lam n nga shi ai majaw dum nta masha ni grai myit tsang nga ma ai re hpe mung chye lu ai.
Dai mung masha marai (21) gaw asak naw ram ai marai (20) hte Hkali a majaw machyi hkrum nga ai asak kaba sai mung masha (1) rai nna dum nta kawn rim hkrum ai re hpe mung chye lu ai. Rim hkrum ai mung masha ni bai lawt wa na matu lit nga ai salang ni kawn Myen hpyen dap hte tsun jahkrup yu ai raitim ya aten du hkra lawt pru wa ai lam n nga shi ai re hpe mung chye lu ai.
Manmaw Muklum grupyin Nmawk kaw daju ai HK. M. Y (437) pawng hpawm dap hpe KIA pawng hpawm dap ni kawn htim gasat ai shata mi jan daram na ai hpang August 19 ya shani padang dip zing madu la lu sai re. Nmawk kaw daju ai Hk.M.Y (437) dap gaw Dap (12) pawng hpawm da nna n-gun (500) grupyin nga ai hpung re hpe mung chye lu ai.
Comments