Pajau Media
5 March 2025
Jinghpaw mungdaw Manmaw majan shata (3) na laman jinghpaw mungdan shanglawt hpyen dap KIA hte pawnghpawng hpung ni gaw myen hpyen dap ni a ahkyak ai dap kaji kaba law malawng hpe zing gasat lu tawn da nna S.K.Hk (21) zing lu na matu matut manoi htu shadut htim gasat taw nga ai hpe shawng lam shiga ni kaw na chye lu ai.
Manmaw majan hpe gaw 2024 December praw (4) kaw na htu shadut htim gasat hpang wa ai kaw 2025 March praw (4) hta shata (3) hpring ai rai nna dai shata (3) laman hta KIA pawnghpawng hpung ni kawn myen hpyen dap ni a dap shara law malawng hpe zing gasat da lu sai hpe chye lu ai.
Dai majan laman myen hpyen dap a ahkyak ai dap ni rai nga ai Hk.L.Y(236), A.M.T(366),masat (7006)hpri gang dap , masat (5014) hpri gang mawdaw dap ,masat (2) electricty hte engineer dap sha n-ga Maanmaw nbungli pa hte muklum kata na dap kaji kaba law law hpe zing lu da sai re.
Dai majaw myen hpyen dap ni gaw dai sum tat mat ai dap law law a majaw muklum kata nbungli bawn, drone hte lak nak kaji kaba ni hte laja lana bai htim gasat nga ai sha n-ga Mungkan hta nmai jailang hkrum pat da ai Cluster bawm hpe jang lang nna htim gasat wa ai ngu tsun ai.
Dai hta n-ga jinghpaw mungdaw majan nnga ai shara ginra hkan du hkra nbungli bawn drone ni jang lang nna jahkring hkring ngu na daram sa htim gasat ai majaw dum nta ni hten za nna si hkala ai ni mung law law nga ai hpe chye lu ai.
Yaten du hkra S.K.Hk (21) dap maga de lahkawng maga na hkrum gasat majan gaw matut manoi laja nga ding yan rai nna mani March praw 4 hta shata (3) du hkra na wa sai re.
Shiga - Hpring
Comentários