Pajau Media
19 February 2025
Jinghpaw mungdan shang lawt hpyen dap KIA kawn zing la lu nna bai tat kau ai A.M.T (366) dap hte HK.L.Y (236) dap lahkawng hpe mani February (18) ya shana hkying (7) aten hta KIA ni kawn bai lu zing la lu sai rai nna S.K.Hk (21) maga de gaw dai ni du hkra majan matut laja nga ding yang re hpe chye lu ai.
“Mana maga lu zing la sai nga tsun ai, dai (366) dap gaw nnan e KIA ni lu zing na bai tat kau ai dap rai nga. Mani gaw (236) dap hte rau bai lu zing la sai re,” nga nna mung msha marai langai tsun ai.
KIA pawng hpawm hpung ni kawn A.M.T (366) hte Hk.L.Y (236) lahkawng hpe zing ngut ai hpang S.K.Hk (21) dap maga de myen hpyen dap kawn nbungli hte laja lana gasat ai ni galaw wa nna lahkawng maga majan matut manoi laja nga ding yang re hpe chye lu ai.
Mung masha ni tsun ai hta mani lani mi hta sha Manmaw majan de myen hpyen dap ni na nbungli (10) ram sa gap ai hpe chye lu ai.
KIA gaw Manmaw muklum kata myen hpyen dap a S.K.Hk (21) dap hte mani zing la lu sai dap lahkawng hte rau Hk.L.Y (47) dap , a-myawk dap, hpri gang dap, nbungli dap, tsi dap hte matut mahkai dap ni hpe htu shadut htim gasat nga ai re.
Shiga – Zau Mai
Comments