Pajau Media
11.12.2024
Manmaw ginra hta byin ai gasat gala majan gaw ya aten du hkra naw laja nga dingyang re hte December 10 ya shani hta mung Myen Hpyen dap a n bungli bawm gap bun ai majaw Mung masha dum nta wan hkru hten ai lam ginra masha ni chye lu ai.
Nbungli bawm hte laknak kaba hkrup mara gap shadam ai majaw Dum nta wan hkru ai Sumla hkrung ni Ganghkau ntsa hkan mawng nga ai majaw dum nta de grai myit tsang ai, matut mahkai Mung n lu ai nga nna manmaw ginra masha langai tsun ai re.
“ dum nta hte matut mahkai n lu ai, grai myit tsang ai, matut mahkai n lu ai hta n ta Mung hkru lawm mat ai da ” nga nna hprawng lawt wa ai dum nta masha langai tsun ai re.
Hprawng lawt wa ai manmaw hpyen yen mung masha tsun ai hta Manmaw Muklum shara law malawng hta wan hkru hten za nga sai hte Manmaw gat kaba Mung Wan hkru ai sha n-ga Deng (3), deng (2) maga na dum nta n kau wan hkru mat ai lam mung chye lu ai.
Manmaw ginra de ya aten Phone matut mahkai Internet line ni yawng dawm kau ai re majaw Dum nta hten za ai lam, mung masha asak si sum ai masa tup hkrak hpe Pajau Media kaw na matut sagawn na matu yak hkak nga ai re.
Myen hpyen dap gaw majan laja wa ai December 4 ya kaw nna Manmaw muklum kata de N bungli bawm laja lana htim gasat nga ai re, ya na zawn laja lana gasat ai majaw Mung masha asak si sum ai lam marai 100 grup yin rai wa sai lam hprawng lawt wa ai ni tsun maram nga ai raitim shagrin la na matu yak hkak nga ai masa re hpe mung chye lu ai.
Ya aten Mung masha law malawng hprawng lawt was ai raitim naw chyat rawng nga ai Mung masha ni naw nga ai re hpe mung chye lu ai. Bat mi daram na hkra byin ai Htim gasat majan laman Manmaw Balik dap, uphkang Rung hte manmaw Dakkasu shar ani hpe KIA pawng hpawm hpung ni Padang dip zing la lu ai re hpe mung chye lu ai.
Comments