Pajau Media
17.3.2025
Jinghpaw mungdaw na Numbat lahawng kaba ai muklum rai nga ai Manmaw muklum kaw na labau shang RC Nawku Jawng hpe mani March 16 ya shana hkying 4 laman hta Myen Hpyen dap kawn wan sa nat ya ai lam hpe ginra masha langai tsun ai kawn chye lu ai.
“Dai nawku jawng wanhkru ai gaw majan byin na hkru ai mung nre , bawm sa kabai na hkru ai mung nre , Myen Hpyen hpung ni da sang wan sa nat ya ai majaw hkru ai ’’ nga nna ginra masha langai tsun ai .
Dai nawku jawng gaw Manmaw kaw na mying kaba ai nawku jawng langai rai nna Manmaw muklum Pauk Kung lawk kaw nga ai San Partrick nawku jawng langai re ai.
“Dai nawku jawng wang kata kaw nawku jawng sha n-ga Jau ni nga na matu galaw da ai nta htap mali gap da ai rai nna nawku jawng maga de Wa saradaw ni nga ai gawk nu langai nga ai. Ngut na Htap Lahkawng gawk nu langai makau kaw masat 2 hpaji jawng hte mung matut da ai re majaw yawng lawm mat chye sai.Hpa na nga yang dai maga de kadai mung nnga sai, wam mye ya na masha mung nnga yang gaw yawng lawm mat sana re ’’ngu lahta na masha bai matut tsun ai.
Manmaw muklum hta lai wa sai shaning December praw 4 ya shani kawn KIA pawmghpawng hpung ni Manmaw muklum zing majan hpe htu sadut htim gasat wa ai gaw dai ni du hkra majan matut byin nga ai lam hpe ginra masha ni tsun ai.
Dai hta n-ga ginra masha ni mung lahkawng maga majan laja nga ai majaw ni htep ai shim ai shara hkan koi yen nga taw ma ai.Ya Manmaw muklum kata na ginra masha ni nnga ai daram re sai re. Ya ten du hkra Manmaw S.K.Hk 21 kata hta majan laja nga ai.
Shiga – Zau Mai
Comments