Pajau Media
3rd March 2025
Aten ladaw na na hpyen yen nga ai Manmaw hpyen yen na HIV ana nga ai ni na matu ART tsi htuk sha taw nga ai ni majan a majaw tsi nnga mat na hpe grai tsang nga ai nga nna tsun ai.
Manmaw majan a majaw ginra masha ni gaw Man Nawng hpyen yen dabang, Manje, Nmawk muklum hte Manwin Gyi hpyen yen dabang shara hkan koi yen nga nna dai hpyen yen dabang hta HIV ana a matu aten ladaw na hkra ART tsi htuk sha nga ai masha ni grai law nga ai hpe chye lu ai.
Ya aten Manmaw muklum kata majan laja taw ai majaw HIV ana machyi nga ai ni na matu Manmaw muklum hte ni htep ai Laiza muklum kata ART tsi htuk sha na matu mayak nga wa nna Myitkyina muklum de sa htuk sha na matu mung hkrun lam grai yak ai re hte hkrun lam manu grai laja ai a majaw nlu htuk sha ai hpe tsun ai.
Dai majaw asak kaba sai nkau mi hte aten ladaw na hkra tsi htuk sha nna nga taw ai ni gaw majan a majaw tsi nlu htuk sha wa nna asak hkrung na matu yak na hpe tsang nga ai re hte ginra masha ni tsun ai gaw Manmaw ginra na Myitkyina de sa na matu mawdaw manu sha pyi marai langai hta sen 3 jan nga ai hpe chye lu ai.
ART tsi htuk sha nga ai ni gaw tsi ndaw mat hkra lu htuk sha taw na hte majan a majaw tsi daw mat na rai yang asak si sum wa na hpe sha la taw ai zawn byin wa na hpe tsun ai re.
Ya aten hpyen yen dabang na matu ART tsi sha n-ga TB ana, hkum kasing si ana, aten galu ana a matu ya sha n ga ma chyangai, ma hkum kanu ni hte laga ana ni a matu tsi karum ai ni law law ra taw nga ai rai nna hkam ja lam hte tsi gawn lajang ya ai karum ningtum ni ra gadawn nga ai lam hpe hpyen yen mung masha ni tsun ai kawn chye lu ai.
Shiga – Htu Seng
Comments