Pajau Media
17.1.2025
Jinghpaw mung Manmaw ginra kata na naw ngam nga ai Myen hpyen dap Ts.K.Hk (21) hte HK.L.Y (47) shara de KIA pawng hpawm hpung ni matut manoi htim gasat nga ai hte Myen hpyen dap kawn Juanuay 16 ya shani du hkra nbungli bawm jahkrat let htim gasat nga ai lam chye lu ai.
Ya aten Manmaw muklum kata shara law malawng hpe KIA pawng hpawm hpung ni kawn zing madu da sai re hte Myen hpyen dap gaw Ts.K.Hk (21) hte HK.L.Y (47) makau grup yin hkan ninghkap gasat na matu n-gun gahkyin shajin nga sai re lam chye lu ai.
Myen hpyen dap kawn nbungli hte shani shagu sa gap nga ai sha n-ga lak nak kaba gap bun ai lam ni a majaw Mung masha dum nta ni wan hkru hkrum ai lam ni mung shani shagu nga ai re lam chye lu ai.
Manje ginra hpe KIA pawng hpawm hpung ni kawn zing madu la ai hpang Hk.L.Y (47) dap hpe lak nak jahkrat na matu tsun sadi jaw ai lam ni nga ai re hte ya aten du hkra gaw Manmaw ginra kata hpyen masa shaja hkat nga ai masa re hpe mungchye lu ai. Manmaw ginra hpe KIA pawng hpawm hpung ni kawn December 4 ya kaw nna htim gasat nga ai re hte ya aten shata mi jan wa sai re hpe mung chye lu ai.
Comments