Pajau Media
24th February, 2025.
Manmaw ginra hta majan laja lana gasat nga ai aten, gumshem Myen hpyen dap gaw majan nbyin ai shara ni hkan nbungli hte mara kata hkrup mara gap gasat ai lam jahkring hkring galaw nga ai majaw mung shawa si hkala ai masha law wa ai hpe ginra masha ni tsun shana wa ai kaw na chye lu ai.
February shata 23 ya shana hkying 11:20 pm aten hta myen hpyen dap kawn Jet nbungli hte Manje ginra kata na Gawk Ngu Yang mare kaw nbungli bawm lahkawng lang sa gap gasat ai hta langai gaw hkrat kapaw ai rai nna, masha hkala ai lam gaw nnga ai hpe chye lu ai.
“Gawk Ngu Yang mare na masha ni gaw hpyen yen ai kaw na wa nga ai pyi nna shi ai re. Mana gaw nbungli bai sa gap ai majaw grai hkrit tsang nga ai. Bai nna majan byin ai lam mung nnga ai. Ginra masha hta lai na gara hpyen wuhpung ni mung nnga ai shara re, bawm gaw langai gaw hkrat kapaw ai, langai gaw nngoi ai re,” nga nna dai ginra masha langai tsun dan ai re.
Lai wa sai February shata 21 ya shani hta mung majan nbyin ai Manje ginra kata na Man Thar mare kaw Y-12 nbungli hte bawm mali sa jahkrat ai majaw mung shawa (2) asak si sum nna, marai (3) gaw hkala sawng ai lam nga ai re.
Asak si sum ai mung shawa ni gaw shadang Ngwa Sa le (asak 8 ning) hte shayi Ya Masi (asak 20 ning) rai nna, hkala hkrum ai ni gaw shayi Ngwa Ye Mi (asak 8 ning), shadang Lu Ka (asak 10 ning) hte Jan Htun San Dar (asak 27 ning) ni re.
Bai nna, 21 ya shani lani mi hta sha, Manmaw ginra na Yae Lay mare kaw mung Myen hpyen dap ni a Y-12 nbungli hte sa gap gasat ai hta mung shawa marai 3 hkala hkrum ai re. Hkala hkrum ai ni gaw asak (40) ning kawn (70) ning lapran na Salang Maung Chin, Jan Hlaing hte Jan Khin ni rai nhtawm, ya aten ni nawn ai shara hta tsi tsi hkam la nga ai re hpe mung matut chye lu ai.
Ya aten gumshem Myen hpyen dap gaw hpyen masa, mung masa lam amyu myu hta hkrat sum nga sai rai nna, gasat gala majan nbyin ai shara hkan nbungli drone ni hpe madung tawn let gap gasat nga ai majaw, mung shawa law law asak si sum nna dum nta ni mung hten za hkrum nga ai re hpe mung shawa ni shana wa ai kawn chye lu ai.
Shiga – Zau Mai
Comments