Pajau Media
6.12.2024
Jinghpw Mung Manmaw ginra zing majan masing hpe KIA pawnghpawm hpung ni kawn December praw (4) kaw hpang ai hta praw (6) ya du hkra gasat matut manoi naw shaja hkat re hte koi yen ai n kau nga ai raitim law malawng naw chyat rawng ai masha naw law nga ai hpe Garum ningtum hpung hkye shaw la na matu shakut nga ai raitim Myen hpyen dap pat shingdang da ai re hpe chye lu ai.
Majan hpang ai hte mung masha nkau mi hka lam hku hpyen yen mat ai raitim law malawng gaw Muklum kata naw ngam taw ai re. Myen hpyen dap ni gaw Manmaw shang lam hte hka lam yawng pat kau nhtawm dai ginra kata na dum nta tsaw ai shara hkan Hkap shingla na matu shajin nga ai masa re hpe mung chye lu ai.
Majan byin nga ai aten Mung masha ni n mai pru hkra pat da ai gaw Myen hpyen kawn Mung masha hpe makawp ninggang shatai na re ng anna Mung masa Hpyen masa maram masam nga ai ni tsun da ai re. ya aten chyat rawng ai Mung masha ni hku nna ahkaw ahkang lu yang lu ai hku hprawng pru na matu tsun hpaji jaw hkat nga ma ai re hpe mung chye lu ai.
Gasat gala majan hta Myen Hpyen dap ni hpyen nbungli ni, laknak kaba hte gap bun ai ai majaw mung masha si hkala hkrum ai ni raitim marai kade re ngu hpe tsun na matu Manmaw ginra kata Phone matut mahkai nlu ai majaw tup hkrak n lu tsun shi ai re. Mung masha si hkala ai lam hte seng nna ginra shiga dap ni kawn tang madun da ai hta Marai 10 lahta asak si sum sai lam tang madun da ma ai re.
Comments