Pajau Media
February 5th,2025.
Jinghpaw mung, Manmaw ginra gasat gala majan hta Ts.K.Hk (21) dap hte ngam ai kaga Myen hpyen dap ni hpe KIA pawng hpawm hpyen hpung ni kawn laja lana htim gasat nga ding yang rai nna, ndai majan gaw dai in February praw 5 ya shani hta shata lahkawng hpring sai re lam chye lu ai.
Lai wa sai December shata praw 4 ya shani kaw nna gasat hpang wa ai Manmaw majan hta KIA pawng hpawm hpyen hpung ni gaw Myen hpyen dap a ahkyak ai dap shara langai rai nga ai Masat (7006) hpri gang dap hpe January shata nhtoi 24 ya shani hta zep zi gasat zing la lu sai rai nna, February praw 2 ya shani hta mung Masat (366) amyawk dap hpe zing la lu sai re.
Dai ni February shata 5 ya shani hta mung Masat (236) dap hte Ts.K.Hk (21) dap ni hpe laja lana htim gasat nga ai re hte Gumshem Myen hpyen dap maga kawn mung nbungli, laknak kaba ni hte ninghkap gasat nga ai lam chye lu ai.
Bai nna, Tatma (88) dap shara la nga ai Manmaw Dakkasu Jawng wang hte Hk.L.Y (47) dap, Masat (641) dap ni hpe mung kalang ta htim gasat nga ding yang re hte lahkawng maga gasat gala majan gaw grai naw laja nga ai re hpe mung chye lu ai.
Lahkawng maga htim gasat ai lam grai naw laja nga ai hte maren Myen hpyen dap maga kawn mung nbungli hte bawm jahkrat gasat nga ai shara ni gaw Nawng Hko, Shwe Kyi Nar, Nam Hpar, Pinsin Kung hte Manmaw Dakkasu Jawng wang makau hkan rai nna, shani shagu ngu na daram gap gasat nga ai re.
Gasat gala majan byin ai shata lahkawng laman Manmaw ginra na mung shawa law law hpyen hprawng koi yen hkawm nga ra ai rai nna, karum ningtum hte mayak mahkak law law mung hkrum sha nga ai hte mungshawa ni a dum nta mung wan nat jahten hkrum nga ai re hpe mung matut chye lu ai.
Manmaw majan hta Wunpawng Mungdan Shawnglawt Hpyen Dap (KIA), Rakhine hpyen dap (AA), Jawng Ma dap (ABSDF) hte rau ginra makawp hpyen hpung (KPDF) ni yawng pawng hpawm shang lawm gasat nga ai re lam Banmaw Scout Team kawn ndau da ai re.
Shiga – Htu Seng
Comments