Pajau Media
22.1.2024
Jinghpaw Mung Manmaw ginra hta KIA pawng hpawm hpung ni hte Myen hpyen dap lapran gasat gala majan loi zim ai raitim Myen hpyen dap a Nbungli Drone hte bawm jahkrat bun ai lam matut manoi galaw nga dingyang re lam chye lu ai.
KIA pawng hpawm hpung ni Manmaw Muklum shara law malawng hpe uphkang da lu sai raitim Naw ngam ai Myen hpyen dap shara Ts.K.hk (21) hpe wang gap nga ai hte Muklum kata gasat gala majan gaw zim nga ai masa re lam mung chye lu ai.
Gasat gala majan zim nga ai raitim Manmaw muklum de January 20 ya shani hta N bungli bawm 36 lang wa jahkrat ai lam, 21 ya shani hta gaw 4 lang wa gap ai hta Shwegyina Hkau Soi seng mayan, Nam Hpa Lam braw Pyiluchaung mayan hte Pinsin Kung lawk hkan wa hkrat kapaw ai lam Banmaw Scout Team kawn tsun n dau da ai re.
Shata mi jan na wa ai Manmaw zing majan laman N bungli bawm, Lak nak kaba gap ai lam, dum nta wan nat ai lam ni a majaw Ya aten Manmaw Muklum gaw htenza sum machyi ai lam byin nga ai re nga nna ginra masha ni tsun ai kaw na chye lu ai.
Shiga – Htu Seng
Comentários