Pajau Media
27.1.2025
Shata mi jan daram na hkra Htu shadut htim gasat ai Manmaw Ts.K.Hk Dap mayan hta gasat gala majan laja nga dingyang re hte January 26 ya shani hta gaw N bungli Pa sha n-ga Makau mayan na dap kasha ni hpe zing madu la lu sai lam ginra masha ni tsun ai kaw na chye lu ai.
“ N bungli pa yawng hpe zing madu la lu sai, raitim Ts.K.Hk 21 hte ni gahtap ai re majaw N bungli pa hte Myen hpyen dap gaw pawng da ai zawn rai taw nga, dai majaw N bungli pa hpe zing madu da lu sai raitim atsai awai zing madu lu ai ngu gaw n mai tsun shi ai, dai mayan de ya mung gasat nga ai” nga nna shawng lam shi sawk ni tsun ai re.
Manmaw N bungli pa hpe KIA pawng hpawm hpung ni zing madu da lu sai raitim ya aten du hkra Ginra jasan bungli n lu shang shi ai re hpe mung chye lu ai.January 26 ya shani hta Tank dap hpe htim gasat lu ai hpang Myen hpyen dap kawn Drone bawm ni hte laja lana htim gasat ai lam, N bungli hte mung 40 Lang daram Htim gasat ai re hpe mung chye lu ai.
January 25 ya hta mung Myen hpyen dap Masat (7006) Tank Dap hpe KIA pawng hpawm hpung ni Tank Mawdaw (7) hpe mung zing madu la lu ai lam chye lu ai. Ya aten HK.L.Y 47, Laknak kaba Dap 641 hte Ts.K.Hk 21, Tatma 88 hte Deng 4 Dap Dap ni de htu shadut htim gasat nga ai re hpe mung chye lu ai.
Shiga – Zau Mai
Comentários