Pajau Media
20 January 2025
Jinghpaw mungdaw, Manje muklum Manwin Gyi mare lawk (3) na dum nta langai mani shani ka-ang hkying langai chyen hta wan hkru lawm mat ai rai nna, grumhpraw manu hku rai yang yawng pawng Sen 450 daram wan hkru lawm mat ai lam, mare masha langai tsun dan ai kaw na chye lu ai.
Nta madu yen gaw madu wa a kanu kawa nta hta nga taw ai aten byin mat ai re majaw nta wan hkru ai mabyin hpe nchye kau lu ai hta n-ga, nta kata na arung arai langai mi mung nlu shaw la ai lam chye lu ai.
“Shan yen gaw nta kaw hpri daw hpri tang mari na bai dut ai bungli galaw nga ai re. Hpa nan nlu la ai, shi kahkau na mawdaw langai ma lawm mat ai. Nta wan hkru taw ai shaloi shan yen gaw nnga ai. Madu wa ngu na wa machyi nna shi na kanu ni nta kaw nga taw ai. Madu jan wa gaw shi hpe hkum hkut ya nna laga shara de sa taw ai ten dai shaloi wan hkru mat ai rai nga. Masha ni wan hkru taw nga ai ngu tsun ai majaw she bai wa yu yang shan nta rai taw ai. Hpa mung nlu shaw la mat ai, yawng lawm mat ai hku re,” nga nna ta tut mu ai mare masha langai mi tsun dan ai.
Nta wan hkru taw ai shaloi makau grupyin kaw na ni karum ai raitim lawan nlu hkye ai hte jahkring mi na laman sha mawdaw langai mi mung lawm mat ai sha n-ga dum nta yawng hkru lawm mat ai hte grumhpraw hku sawn yang dai mawdaw langai mi Sen 180 ram hte dum nta gaw Sen 250 ram wan hkru lawm mat ai re hpe matut chye lu ai.
Dum nta masha ni tsun dan ai hta lai wa sai shaning (20) ning hta mung ya na zawn wan hkru lai wa sai re hte dai ning mung kalang bai byin ai mabyin re lam tsun dan ai.
Shiga - Zau Mai
Comentários