Pajau Media Channel
15th August, 2024
Wunpawng Mungdan Shanglawt Hpyen Dap (KIA) hte Myen hpyen dap lapran byin ai gasat gala majan a majaw Man Je ginra mung masha ni hprawng yen ra mat ai hta mung masha ni yen kau da ai dum nta ni hkan dum nta adup hpaw mya la ai manghkang ni hkrum katut nga ai re lam chye lu ai.
Mung masha ni yen kau da ai dum nta hkan ka-ni lu sha ai masha ni gaw manu dan ai arung arai, malu masha hte tsi mawan ni hpe nta zaw adup hpaw nna mya la kau ya ai re nga nna ginra masha ni tsun ai kaw na chye lu ai.
Man Je ginra kata lai wa sai July 24 daram kaw nna Manmaw-Nmawk ginra kaw dap jung ai Myen hpyen dap hte KIA pawng hpawm hpyen hpung ni lapran gasat gala majan byin ai majaw mung masha ni gaw kadai mung kadai shimlum dum ai ginra ni de hprawng yen mat ai re hpe mung chye lu ai.
Manje ginra Hka Pra mare, Lai Law, Bum Kahtawng hte Man Win ginra hkan mung masha ni hprawng koi yen nga ai re hte ya aten du hkra Manmaw ginra kata hpyen masa grai naw shaja hkat nga ai sha n-ga Myen hpyen dap gaw aten ntam, shara n lata bawm gap jahkrat bun ai lam ni nga ai majaw shimlam grai tsang ra ai madang re hpe mung chye lu ai.
Yorumlar