Mamung Kai Mare Na Mare Masha Ni A Dum Nta Makau De Du Hka Ja Ladu Lai Htu Sha Wa Nga

Pajau Media

4rd, February, 2025

Jinghpaw Mung, Mohnyin muklum, Inndaw Gyi ginra Mamung Kai mare hta mare masha ni a dum nta makau de du hka Backhoe kaba manga hte ja ladu lai htu sha taw nga ai lam ginra masha ni shiga jaw ai kaw na chye lu ai.

“2024 ning htum maga de mare makau na lamu ga Acre 10 hpe Mamung Kai na lauban langai hpe ja htu na matu dut jaw kau ai. Acre langai hta Sen 3500, Acre 10 rai yang Sen 35,000 hte dut kau dat ai. Mare kata re majaw lamu ga dut ai wa gaw laknak lang hpung langai mi hpe 10% sen 3,500 jaw ra ai. Laknak lang ai hpung ni hpe ahkun hkangse jaw na htu ai gaw re,” nga nna Mamung Kai mare masha tsun ai.

Mamung Kai mare mawdaw lam makau hkan e Daru Magam Zing ai 2021 ning kawn ja matut manoi htu nga ai rai nna, 2024 ning shaning htum maga de gaw mare masha ni a dum nta makau hkan du hkra htu sha wa ai re lam tsun ai.

Dai zawn jak kaba ni hte ja shani shana htu sha ai majaw dai makau kaw na marę masha ni shani shana jak nsen ngoi kabrawng ai a majaw nmai nga, n lu nga ai lam lahta na mare masha sha lawu na hte mareng matut tsun dan ai re.

“Nta makau du hkra htu ai majaw shana shagu Backhoe ngoi ai nsen hte nmai yup ai, asak kaba ai ni gaw grau hkamja lam hkra ai,” nga nna tsun ai.

Inndaw Gyi ginra hta Myen hpyen gumsen hpung ni Daru Magam Zing ai kawn ja matut manoi htu wa ai a majaw shingra hpyen hte lamu marang galai shai wa ai hta dai ning gaw yi shun hkauna galaw sha ai ni shawoi shaning na hta grau sum machyi law ai lam mung tsun ai.

Dai sha n-ga Mamung Kai mare makau na lup wa dingsa hta mung ja htu sha nna, nkau mi gaw mare masha ni nga ai nta makau du hka htu sha nga ai lam dai ginra masha ni tsun ai.

Ya ten dai ginra majan a majaw mung masha ni gaw simsa lam nlu nga ai raitim tara nshang ja htu sha ai ni gaw law she law wa ai lam mung chye lu ai.