Pajau Media
11 February 2025
Jinghpaw mung daw Myitkyina lahta Mali Hka ginra Tang Hpare hte Sumparabum sa lam Lamung Zup, Woishi hkan ndai laman Myen hpyen dap ni kawn hpyen n-gun htu shadup nna hpyen shamu shamawt ai ni grau galaw wa let laknak kaba ni hte sha n-ga Drone ni hte jahkring hkring sa gap ai lam ni nga ai re hpe ginra mung masha ni tsun ai kawn chye lu ai.
“Ndai laman shana shagu ngu na ram Mali Hka maga de laknak kaba nsen ni na ai. Mana maga mung lak nak ni gap ai hpe mu ai, ngut na Mali Hka maga de myen hpyen dap ni kawn hpyen n-gun jat nna hpyen shamu shamawt ai lam ni nga ai,” nga nna ginra masha langai tsun ai.
Myen hpyen dap kawn jat da ai hpyen n-gun law malawng gaw Lamung Zup hka a maga mi de na nam maling kata hkan shamu shmawt nga nna Myen hpyen la nkau gaw Lamung Zup mare shang wa ai shara kaw shagyit dung nna lai wa lai sa mung masha ni hpe jep san ai lam ni, gumhpraw hta ai lam ni galaw nga ai re hte hpyen shamu shamawt lam ni galawa nga ai hpe mung masha ni tsun ai kawn chye lu ai.
“Hpyen n-gun grai jat da ai Mali Hka maga de, hkying hku nga ai. Raitim shahte gaw nam maling kata hkan sha nga ai,” nga nna ginra masha langai bai kahtap tsun dan ai re.
Ya aten dai ginra mayan KIA hte Myen hpyen dap ni a lapran majan hkrum katut gap gasat ai lam nnga ai raitim Myen hpyen dap kawn Drone, laknak kaba ni hte jahkring hkring sa gap ai lam ni galaw nga nna hpyen n-gun mung mi na hta grau jat da ai hpe chye lu ai.
Lai wa sai bat hta Myen hpyen dap ni gap dat ai lak nak kaba a majaw Aung Myintar mare na Yup Zau Hkawng a wang kaw lak nak langai wa kapaw nna Sadung mare hta mung masum lang hta n-ga nbungli hte bawm wa jahkrak kapaw bun ai re hte Woishi mare hta mung masum lang bawm sa jahkrat bun ai lam ni nga nna dai mabyin masa ni a majaw mung masha ni grai hkrit tsang nga ai hpe chye lu ai.
Shiga- Hpring
Comments