Pajau Media
6th February 2025
Putao, Machyang Baw lahta Mali Hka mayan ja ladu lai htu sha ai laning mi na wa ai hpang Mali Hka hka nsan wa nna ginra masha ni yak hkak nga ai lam Machyang Báw mare masha ni tsun ai.
Shawng de ja nhtu shi ai shaloi Putao hte Machyang Baw mare masha ni gaw Mali Hka hpe lu hka, sun hkauna kaw lang na matu hte Nga hkwi sha na matu lang ai rai tim ya ten Mali Hka lahta maga de ja grai htu sha ai majaw lu hka nsan seng mat ai sha nga Pada(Mercury) a majaw hka hta Gung lawm wa ai du hkra byịn taw nga ai lam ginra masha ni tsun nga ai re.
“Ya gaw Machyang Baw ntsa Nam Hkam, Namsa Bum mare ni yawng Backhoe jak kaba ni hte ja htu sha taw sai. Ya hpang de gaw hkying hkum 24 hka hkanu taw nga, tsep kawp nsan mat sai. Anhte hka makau mayan na masha ni gaw hka na Nga, Hkoi ni hte na lu hka kaw na hkawt n mai lang mat sai. Shawoi na zawn Nga hkwi sha ai ni mung ya hpang de nmai hkwi sha mat sai. Shawng de Nga joi mi hta law htum Lap Mun Lahkawng sha nga ai kawn ya Lap Mun Mali du nga sai. Dai pi dut ai masha nnga ai daram re, Nga hkwi na shara ma nga sai,” nga nna ginra masa hpe tsun dan ai re.
Shawng de Machyang Baw Mali Hka sumri mahkrai lahta ja htu na lam pat da nna makawp maga da ai raitim ya gaw Mali Hka lahta mare makau kaw na hka hking gau mayan yi shun hkauna sha n ga mare kata du hkra jak kaba ni hte htu sha na ahkang jaw ai majaw ginra masha ni grai yak hkak nga ai lam chye lu ai.
Shiga -Mali Hku
Komentarze