Pajau Media Channel
3rd May, 2024
Putao ginra masha ni law malawng gaw mali hka, Hka Nam maga de Hpakant Yang de chying hkrang sun galaw sha ai ni law ai re hte dai ning gaw chying hkrang tum htaw la na aten jak li hkrun lam pat mat ai majaw nlu htaw la sum machyi ai lam byin nga ai re nga nna ginra masha langai tsun ai.
Putao ginra kata na Mung masha law malawng gaw jak li hkrun lam hpe madung tawn nna Mali Hka mayan chying hkrang sun galaw sha ai hta lai wa sai march htum maga kaw nna jak li hkrun lam hpe ginra P.T.Ts hpung ni kawn pat kau ai majaw chying hkrang tum n lu shalai la nna sum machyi nga ai maga de du nga sai nga nna ginra masha langai tsun.
“ Dai ning gaw sum kaba re sai, jak li hkrun lam bai pat, sau manu gaw bai tsaw re ai hte ya gaw dai hku nan jan sai ga re, baw hte gun la na mung hkrun lam grai yak ai bai rai nga yang gaw dai ning gaw sum sai ga re, kadai mung nlu htaw la ai ga rai nga,”
Mali hka hkrun lam lapran kaw hkawm ai jakli langai lahkawng gaw nga ai jak li ni hpe chying hkrang tum htaw shalai la na matu jahkrup yu ai raitim htaw manu hpe sen manga daram du hkra jahkrup yu ai raitim n htaw ai masa re, jak sau manu ladu lai tsaw ai majaw lam magup ginchyum chyat yak hkak wa ai masa re, htaw manu mung tinang shakut da ai hta htam lahkawng masum bai ma ra na masa nga ai majaw n htaw la sai lam ginra masha matut tsun dan ai re.
“mung masa hpyen masa a majaw ginra masha ni hta sum machyi ang mat ai ga rai nga, yak yak hkak hkak re na galaw sha nga ai kaw ya na zawn bai byin, matsan ai ni a matu gaw grau yak hkak ai lam re, gat kaw mari sha na mung nloi mat sai, dai majaw tinang lu lawm ai n-gun atsam hte shakut da ai gaw kaman sha re mat sai, grai sum machyi sai ga re”
Ya ginra masha ni sun galaw ai shara gaw Machyang baw kaw nna hka lam hku yu wa maga hkying hkum mi jan hte Lung wa maga gaw hkying hkum masum daram na hkra jakli jawn ra ai re, lagaw lam hkawm yang lahkawng na daram yup yang she sun galaw ai shara de du ai hkrun lam re hpe mung chye lu ai. Jak li hkrun lam hpe madung tawn nna galaw sha ai re majaw hka lam lawan hpaw ya na hpe mung ginra masha ni myit mada nga ma ai re .
Nawng Hkai jak li daru hte mali hka lam mayan hta ginra P.T.Ts hpung ni sin kawp la nga ai lam, Myen hpyen dap kawn aten n masat jak li hkrun lam pat kau na matu galaw wa ai gaw Mali hka, Hka Nam de KIA-PDF ni malu masha htaw shalai n mai hkra galaw ai re masa raitim ta tut hta mung masha ni grai yak hkak nga ai re lam matut tsun ai.
Shiga - Hugawng
Comments