Pajau Media
January 4th, 2025.
Monyin Muklum kata hta Gumshem Myen hpyen dap kawn gasat gala majan byin ai lam nnga ai sha, lak nak kaba gap shadam nga nna, mare kata hpyen mawdaw hte n-gun madun shinggrup hkawm nga ai lam, ginra masha ni shana wa ai kaw na chye lu ai.
January shata praw 2 ya shani ka-ang kaw nna, lak nak kaba hte ding yang gap bun ai majaw ginra masha ni gaw lak nak shadam hkrat kapaw na hpe, grai hkrit tsang nga ma ai re.
“mani shani ka-ang kawn Htan Dapin mare kaw nna lak nak kaba ni hte shana yup tung du hkra gap bang ai, daihpawt du hkra re.” nga nna Htan Dapin mare masha langai tsun dan ai.
Hpyen n-gun (200)daram lawm ai hpyen mawdaw (15)hte hpyen hpung ni gaw Htan Dapin mare maga de rawt lung mat wa nna, bai nhtang pru wa ai ten muklum shinggrup n-gun madun hkawm ai majaw, ginra masha ni gaw sinat nsen ngoi wa na hpe grai hkrit tsang ai lam tsun ai re.
Htan Dapin mare hta lai wa sai ten hta mung dum nta langai hta Myen hpyen dap kawn gap dat ai lak nak hkrat hkra nna, amyu shayi langai a la pai ta kaw wa hkra ai majaw lahpum kaw na lata yawng di kau ra ai mabyin nga yu sai lam, ginra masha ni tsun dan ai kaw na chye lu ai.
Shiga – kachin Pyi Tar
Comentários