Pajau Media Channel
16th March,2024
Putao, Lung Sha Mare kaw Dap Jung nga ai HK.L.Y (138) hte P.T.Ts pawng hpawng hpung ni gaw March (15) ya shana hkying (8:00) PM aten daram hta laknak kaji kaba matut manoi gap shadam ai majaw makau mayan hkan na mung masha ni gaw nam de hprawng koi yen ra nga ai re lam chye lu ai.
Mare makau mayan de minute (15) daram na hkra gap shadam ai, Lung Sha Yang kaw Myen hpyen dap jung wa ai hpang kaw nna maja let nga ai mung masha ni sanat n sen na ai hte shana jang hprawng yen ai lam Lung Sha Yang ginra masha langai tsun ai. “Mana (8:00) PM daram hta Lung Sha Yang hpyen Dap shara kaw na shawng laknak kaba masum lang matut manoi gap ai, ngut ai hpang laknak kaji bai minute (15) daram na hkra matut manoi gap shangoi ai, sanat n sen matut manoi gap shangoi wa ai majaw majan byin ai shadu ai, dai majaw dai makau mayan hkan nga ai mung masha ni gaw kalang ta hprawng yen mat ai” nga nna ginra masha tsun ai.
Myen hpyen dap kata na hpyen la ni gaw ginra shimlam hku nna jahkrit shama gap shadam ai re lam, Myen hpyen dap gaw Lung Sha mare ka-ang kaw dap jung nga ai re majaw ya na zawn sanat gap shadam ai majaw mung masha ni gaw grai hkrit tsang nga ai re hte ya aten na masa gaw galoi aten gara hku byin wa na re n chye ai majaw aten hpring maja nga ra ai lam mung tsun ai re.
Ya aten Lung Sha Yang mare makau mayan hta Myen hpyen dap hpyen shamu shamawt lam galaw ai hte mung masha ni hpe san jep ai lam ni mung galaw nga ai re hpe mung chye lu ai. Myen hpyen dap hte grai ni gahtep ai mung masha ni gaw nam de naw koi yen nga dingyang re lam mung chye lu ai.
Ya aten Myitkyina-Putao hkrun lam ntsa Sumpra Bum kaw gasat gala majan grai laja nga dingyang rai nna mawdaw hkrun lam mung pat nga dingyang re. 2022 February shata (3) ya hta mung kajawng kaja majan byin wa ai majaw Lung Sha Yang mare masha (5,000) daram gaw nam de shata masum na hkra koi yen hkawm ra mat ai re, Lung Sha Yang mare ka-ang kaw na Myen hpyen dap shara jahkrat nga ai re hte gasat gala majan gaw aten n tam byin wa mai ai majaw mung masha ni gaw maja let nga ra taw ai masa re lam mung chye lu ai.
Shiga – Mali Hku
Comments