Pajau Media Channel
July 15, 2024
Putao, Lung Sha Yang mare kaw dap jung nga ai HK.L.Y (46) hte ginra P.T.Ts pawng hpawm hpung ni gaw mare uphkang salang ni hpe masha n-gun latsa daram gahkyin ya na matu matsun wa ai lam ginra masha ni tsun ai.
“Lai wa sai bat kaw mare, lawk shagu na salang ni hpe shaga la na dai lam hte seng na zuphpawng galaw ai. Mare salang wa hpe wa tsun ai kaw na n dai lam gaw n mai byin ai ngu tsun da sai re, raitim myen hpyen dap maga na gara hku galaw wa na kun gaw n chye ai, dai majaw mare masha ni sadi maja na hkawm sa na matu matsun da ai lam nga ai.”
Hpyen dap maga kaw nna gara hku galaw wa na ngu hpe nchye ai, atik anang lahkawn wa mai ai masa mung re majaw grai myit tsang ai lam mung tsun ai re.
“Myen hpyen dap gaw February shata kaw na shapraw da ai hpyen magam n gun n mai ngu ai Upade hta lawm ai asak (18-35) lapran na ni hpe atik anang shaga na kun ngu ai hpe myit tsang ai.”
Ya aten Myitkyina-Putao hkrun lam mayan hta hpyen masa shaja hkat ai aten mung re majaw hkrun lam lapran mare kahtawng ni rai nga ai Sumpyi Yang hte Lung Sha Yang mare hkan na mung masha ni hpyen koi yen nga ma ai re. Lung Sha Yang, Sumpyi Yang mare kata hkan myen hpyen dap shara jahkrat nga ai rai nna aten n tam gasat gala majan byin wa mai ai majaw mung masha ni grai myit tsang nga ma ai lam mung chye lu ai.
Lung Sha Yang mare gaw Putao-Myitkyina hkrun lam ntsa kaw nga ai mare kahtawng langai re hte htinggaw (800), mung mahsa (5,000) shanu nga ai mare kahtawng langai re hpe mung chye lu ai.
Shiga- Mali Hku
Comments