Lisu P.T.Ts Ningbaw U Shwe Min Asak Si Sum

Pajau Media Channel

7th March,2024

Myen hpyen dap npu Waimaw ginra Lisu P.T.Ts ningbaw U Shwe Min gaw March (7) ya jahpawt daw Waimaw Hka Shi mare de du wa ai aten KIA kawn kalang ta htim gasat ai hta dai shara kaw nan asak si sum mat ai lam chye lu ai.

March (7) ya jahpawt daw hkying (7) daram hta Waimaw Shwe Nyawng Pin maga de 4 Wheel mawdaw langai hte pru wa ai aten KIA hpyen hpung ni kawn hkap gasat ai hta shwe Min hte rau mawdaw kaw jawn lawm ai hpung ni yawng asak si sum mat ai re lam jinghpaw hpyen hte seng ai shiga dap ni tsun ai kaw na chye lu ai.

Myen hpyen dap hte seng ai People Media Telegram kaw tang madun da ai hta “Dai hpawt daw hta jinghpaw mung Waimaw, Awng Mye (1) mare Nlung Hka mahkrai makau kaw Lisu P.T.Ts ningbaw U Shwe Min gaw KIA htim gasat ai hta asak si sum mat sai, Moi mang gaw ya aten KIA a lata hta re” lam shiga ka mara da ai kaw nna mung mu chye lu ai.

Lisu P.T.Ts Ningbaw U Shwe Min a mying majing gaw U Si Hpa Lar Lu ngu ai re hte Myen hpyen dap kawn lak san shagrau hkrum ai (သီရိပျံချီဘွဲ ့) ngu ai mying mung lu da ai rai nna 2020 shaning na ra lata poi hta hpu nau Lisu amyu sha hkringmang shara kaw shang shingjawng ai aten awng dang lam lu da ai salang langai re hpe mung chye lu ai.

2021 Myen hpyen dap kawn Myen mungdan daru magam ahkang aya zing madu ai hpang kaw nna Myen hpyen dap a madi shadaw ai mahkrun kata Waimaw ginra hta daju ai Lisu P.T.Ts hpe hpaw ninghtan wa ai rai nna 2023 shaning October shata (30) ya hta Lisu amyu sha htinggaw langai mi kaw marai langai P.T.Ts n galaw n mai nga ai Upadi shanang n dau wa ai re hpe mung chye lu ai.

W.P mungdan shanglawt hpung (KIA) kaw na gaw Myen hpyen dap a lagaw lata tai nga ai P.T.Ts hpung ni hte jarit sin hpyen hpung ni hpe Mung shawa hpe makawp maga ai lam hta rau shang lawm shang tsap sa wa na matu sadi jaw, shadum jahprang ai lam ni lang hte lang galaw lai wa sai raitim hkap la madi shadaw ai lam n nga ai re. U Shwe Min woi awn ai Lisu P.T.Ts hpung gaw Lisu amyu sha yawng a gawng malai tai ai hpung nre nga nna Lisu ramma law malawng gaw ninghkap ai lam n dau laika shapraw lai wa sai re hpe mung chye lu ai.

W.P Mungdan shang lawt hpung (KIA) woi awn ai pawng hpawng hpung ni gaw March (7) ya jahpawt kaw nna Myitkyina-Manmaw lam kaba dingyang hte Nmawk, Ginjaw Ginra Laiza makau na Myen hpyen dap dap jung ai shara (13) daram de htu shadut htim gasat majan baw hpang dat sai rai nna U Shwe Min woi awn ai P.T.Ts dap hte rai yang Myen hpyen dap shara ( daram hpe zing madu la lu sai lam shiga ni hta tang madun da ai.