Pajau Media
28.3.2025
Myitkyina Danai lam Lawa mare kaw Myen hpyen dap P.T.Ts pawng hpawm hpung Lawa mare kata sinat kaba shadun nna wa shang nga ai majaw Lawa mare masha law malawng hprawng yen nga sai sha n-ga hpyen masa grai shaja hkat nga ai lam hprawng yen wa ai Lawa mare masha langai tsun ai.
Myen hpyen dap ni Lawa mare lahta na dap dingsa kaw hpyen dap bai wa dung na masing re lam, dai hpe KIA maga kawn myit n hkrum ai majaw ya aten shada hpyen masa shaja hkat nga ai masa re nga nna Myitkyina de koi yen wa ai mung masha langai tsun ai re.
“Lawa mare lahta moi na Myen hpyen dap dingsa kaw Myen ni bai wa dung na nga tsun ai da, dai hpe shang lawt ni n hkraw ma ai majaw ya aten hpyen masa grai shaja taw ai masa re. Mare kaw Myen ni wa nga sai re majaw mare masha ni law malawng gaw yen sai. N ta sin na matu langai lahkawng daram sha nga sai. An nu ni pyi tsam mari yen wa sai re,” nga nna Myitkyina de koi yen wa ai hpaw mi langai tsun ai re.
Lawa Mare makau grupyin de Myen hpyen dap pawng hpawm hpung ni gaw lak nak kaba hkrup mara gap shadam ai sha n-ga Drone hte dingyang gawan hkawm nga ai re hpe mung chye lu ai. Ya na zawn mare kata de Myen hpyen dap ni shang wa ai majaw Lawa mare masha ni koi yen ra mat ai hta hprawng yen wa ai lam kaw mung ladu lai jep ai nga nna matut tsun dan ai re.
“Myen ni mare de shang wa ai hte mare masha ni gaw bum de koi yen sai. Shana aten bum de dat wan htoi hpe mu jang mare kaw na sinat kaba ganoi gap bun ai. Mare kaw ngam taw ai salang ni she mare masha ni re ngu na tsun yang she n gap mat ai. Lam kaw mung grai jep ai. N-gu buk re chye nga ninglen hpaw shangun ai daram du hkra jep ai. Ya aten Lawa maga de hpyen masa gaw grai shaja hkat nga ai re,” nga nna tsun ai re.
Lawa mare de Myen hpyen dap pawng hpawm hpung ni gaw March 22 ya daram kaw nna wa shang nga ai hte hpyen n-gun 200 grupyin re lam tsun maram da ma ai re. Koi yen mat ai dum nta hkan zaw n la na matu tsun ai sha n-ga zaw la da yang dum nta wan nat na lam ni tsun jahkrit ai re hpe mung chye ju ai. Ya aten Lawa mare kata hpaji jawng hte mung shawa dum nta hkan Myen hpyen dap kawn shara la nga ai lam mung chye lu ai.
Shiga – Pyilan U
Comments