Pajau Media Channel
7th September, 2024
Waimaw Lamyang, Hka Nan mare hpyen yen Mung masha ni hta n dai laman yu hkraw machyi, hkali machyi ai masha ni law nga ai hte tsi mawan hte malu masha ni mung sha na n lu wa sai majaw kaga mare kahtawng hkan na garum hpyi let she malu masha hparan ra ai madang yak nga ai hpe chye lu ai.
“Ya hte gaw Hkali bu ai masha hkrai, dabang kata kaw Hkali n machyi ai masha pyi n nga ai daram re, ya hte ngai mung bat mi ram na hkra Hkali machyi mat ai. Dai ngut ai hpang yu hkraw bai machyi, dan re machyi ai masha grai law ai, n kau gaw tinang na mahkrun hte Waimaw Mung Shawa Tsi Rung de du ai ni du rai na machyi masha grai law ai,” nga nna tsun ai.
Ya aten Hka Nan mare shinggan de koi yen ai Mung masha ni malu masha grai yak hkak nga ai re. Mi moi kaw nna yi sun hkau na galaw sha ai ni gaw shata masum mali sha na matu tau hkyen da ai lam nga ai raitim ya aten malu masha yak hkak ai htingaw ni gaw mi kaw nna nchyang bungli galaw let kan bau bungli galaw ai ni grau yak hkak nga ai re hpe mung chye lu ai.
“Anhte maga gaw garum ningtum hpung ni nan n lu du ai, garum ningtum hpung ni mung hpyen man ginra de n mai sa ai, sa yang shanhte mung Blacklist jahpan de shang wa yang yak ai, garum ningtum ra yang Myo de yen mu nga na bai tsun wa ai re majaw anhte mung bai gahtap yen na matu grai yak sai, n dai laman gaw sha na nlu ai htingaw ni law wa ai majaw Mang Shang mare de bai wa garum hpyi na N-gu buk mali garum ai, dai ma yang gaw gara hku bai di na kun n chye sai,” nga nna tsun ai re.
Waimaw Lamyang grup yin mare kahtawng hkan na mung masha ni dai ning gaw Yi mung n lu galaw, hkau na mung nlu galaw, hpyen yen ladaw na wa yang grau yak hkak wa mai ai lam mung tsun ai re. Waimaw ginra Myen hpyen dap P.T.Ts pawng hpawm hpyen hpung ni shara jahkrat nga ai Wunyan makau grup yin de aten ntam gasat gala majan byin nga dingyang re hte Myen hpyen dap kawn shana daw de shagu lak nak kaba gap shadam ai lam dingyang galaw nga ai re hpe mung ginra masha ni tsun ai kaw na chye lu ai.
コメント