Pajau Media Channel
11st June, 2024
Jinghpaw mung Waingmaw, Hkat Cho mare kaw June (10) ya shana hkying (8:00) PM aten daram hta myen hpyen dap kawn gap dat ai lak nak kaba wa hkrat kapaw nna mung masha marai (1) asak si sum ai hte marai (6) hkala hkrum ai lam chye lu ai.
Asak si sum mat ai mung masha gaw asak (26) ning re ai wa rai nna tsi tsi hkam la na matu Waingmaw tsi rung du ai hte asak si sum mat ai re. Dai sha n-ga hkala hkrum nna tsi rung kaw tsi tsi nga ai marai (6) kaw na marai (3) gaw hkala ningma grai sawng nna tsang ra ai madang re lam mung chye lu ai.
June (10) ya jahpawt daw maga hta mung Hkat Cho, Nawng Si Paw mare kawn pru wa ai myen hpyen dap hte KIA pawng hpawm hpyen hpung ni lapran gasat gala byin ai hta myen hpyen dap maga kawn lak nak kaba gap garum ai lam ni galaw nga ai re.
Myen hpyen dap gaw gasat gala majan n nga ai raitim lak nak kaba hkrup mara gap shadam ai hta June (10) ya shana daw hkying (3:30) pm aten daram hkan Drone bawm wa jahkrat ai hta Lamyang mare Hka Nan buga nawku jawng kaw wa hkrat nna yawng hten za mat ai re hpe mung chye lu ai.
Ya aten Waingmaw, Nmawk hte Manje ginra kata hpyen masa grai shaja hkat nga ai masa re hte gasat gala majan gaw shani shagu ngu na daram byin nga ai re.
Myen hpyen dap gaw mung masha ni yen kau da ai shara ni hkan lak nak kaba hkrup mara gap bun ai majaw yen kau da ai mare kahtawng hkan na mung masha dum nta ni law malawng ngu na daram hten za nga sai re hpe mung chye lu ai.
Comments